Shillong: Risaw 27: Ki nonghikai kontrak hapoh ka shatri jong ka Meghalaya Government Lower Primary School Contractual Teacher Association (MGLPSCTA) hynne ka sngi ha ka sien kaba lai ki la shah khot hajir biang ha Sardar Police Station.
Kane ka jingshah khot hajir jong ki ka long hadien ba ki pulit kila kyrwit ejahar kylla pyrshah ïa ki nonghikai kiba ujor ejahar ia ki pulit ba kawang tear Gas ia ki nonghikai ha ka jingiakhih bala pynbud da ka jingleit tur sha Secretariat.
Haba kren sha ki lad pathai khubor u Assistance Finance Secretary bah Babitdor Hoojoh u la ong ba ki pulit kila kynnoh ba ki nonghikai kila pynkheiñ ïa kata ka kyndon CrPC bad buh ki kyndon pynshitom kat kum ka aiñ.
U bah Babitdor u la ong ba na ka liang ki nonghikai ki la kyrpad ia ki pulit ba kidei ban weng noh ïa kane ka ejahar namar ba kim kwah ban ai ding pyrshah bad ki pulit ne bad ka sorkar.
Ula ong ba na ka liang ki nonghikai ki la ong ba mynta kin ap shwa ia ka jingkular u Myntri Rangbah bad u Symbud Myntri Rangbah ka jylla ba kin iakren ha ka jingialang jong ka kynhun Myntri Sorkar haba iadei bad ki jingdawa ki nonghikai kontrak ba shah wengkam.
