Shillong, Risaw 27: U Myntri Rangbah ka jylla u Conrad K Sangma ula pyntip ba ka sorkar jylla kam pat ioh pdiang satia iaka kaiphod na ki bor pyniaid distrik ha kaba iadei bad ka jingshah kawang bomb pynsat khmat ki nonghikai ha ki pulit kaba la jia dang shen ha nongbah Shillong.
“Ngim pat ioh pdiang ia ka kaiphod halor katei ka jingshah kawang bomb pynsat khmat ki nonghikai. Ngam dei u briew uba sngewtynnad ia ki kam iaumsnam la ka long ha kano kano ka dur” ong u Conrad Sangma haba iakren bad ki nongthoh khubor.
“Nga tharai ba ha kine ki 4 snem shiteng kiba la leit, phi lah ban iohi ia kata la ka long ia kano kano ka ishu ne mat. Nga ngeit skhem ba ka lynti kaba bha tam kadei lyngba ka jingiakren ba ngi lah ban iaid shakhmat bad dei halor kane ka daw ba nga iakynduh ia baroh” ong u Conrad.
Ula ong, ki don ki huri hura bad ki kynrum kynram kiba jia bad ka Sorkar kam shim la ai jingbit ia ki nonghikai ban wan tur sha Secretariat namar bala pynjari iaka kyndon 144 CrPC.
U Myntri Rangbah ula ong, imat namar ba ki pulit ki iohi ba ki dei ki nonghikai bad ba ki don iaka jingsngewkhia ioh ka mih kano kano ka jingjia kumta kila kawang da ki Tear Gas kaban dei la lynti kaba suk tam ban pynpra ia u paidbah khlem da donkam ban iaid da ka lynti ban poi sha ka jingiaumsnam.
