Shillong, Lber 19: Ka District Magistrate ka East Khasi Hills Kong RM Kurbah kala pynmih iaka hukum ba khang pyrshah ban bret bad pyntuid jaboh bad khyndew ha shilynter ka surok rim NH‐40 naduh ka lad KHADC shaduh ka Jingkieng Umiam.
Kala pynpawba ka jingbret pathar ïa ki jaboh bad khyndew ka wanrah jingma ia ka koit ka khiah ki paidbah bad iaka mariang.
Ha ka hukum ba la pynmih katkum ka kyndon 163 jong ka Bharatiya Nagarik Suraksha Sanhita, 2023, ka Kong Kurbah ka la ong ba ym shah ia kino kino ki briew ne kynhun ban bret ïa ki jaboh, ki plastic, ne khyndew ha ka surok shi lynter naduh Garikhana‐Mawlai‐Umiam, lane ban pyntuid ïa ki jaboh sha ki wah ba marjan.
Ka hukum ka kdew ba kino kino kiba pynkheiñ kin ngat bad shah pynshitom ha ka aiñ katkum ka kyndon 223 jong ka BNS bad kiwei kiwei ki kyndon ain.
“Kum kine ki kam ki long kum ka jingpynthut paidbah kaba lah ban wanrah ïa ka jingma ïa ka koit ka khiah” la ong ka hukum da kaba kdew ïa ka jingdonkam kyrkieh ban pyntreikam iaka hukum tad haduh ban da mih kiwei pat ki hukum.
