Shillong, Nailar 12 : Haduh hynriew ngut ki nong Meghalaya kiba ioh ia ki skhim bapher bapher ka Sorkar Pdeng, kila shah khot ban sakhi ia ka jingrakhe Independence Day ha Red Fort, Delhi, ha ka 15 tarik Nailar, 2023 kum ki nongshah khot kyrpang.
Kumba 1700 ngut ki nongshongshnong na kylleng ka Ri kiba ioh ia ki skhim Flagship bapher bapher kum ka Jal Jeevan Mission (JJM), PM Kisan Samman Nidhi Yojna, Amrit Sarovar Yojana, Central Vista Project bad kiwei kiwei, kila shah khot sngewbha ban sngap ia ka jingkren u Myntri Rangbah Duh ka Ri Narendra Modi sha ka Ri n aka rynsan jong kane ka jingtei ba sahnam ka Ri.
Ka sienjam ban khot ia ki briew bapher bapher na kylleng ka Ri bad ban iadonbynta lang ha ka jingrakhe, ka dei kaba la shimkhia da ka Sorkar Pdeng kaba iaid ryngkat ryngkat bad ka jingthmu jong ka ‘Jan Bhadidari’.
Ki briew ba shah khot na East Khasi Hills
Lai ngut ki nongioh ia ka skhim JJM na Meghalaya kila shah khot kum ki nongshahkhot kyrpang ha ka jingrakhe I-Day ha New Delhi. Kine ki lai ngut ki kynthup ia ka Kong Gloria Umsong na Mawkynrew, East Khasi Hills, Jenesiuis Marwein na Mawkynrew, East Khasi Hills bad Babiangmon Lapang na Mawhrew, Ri-Bhoi District.
Ka Kong Gloria Umsong kala pynpaw ba ka dei ka kabu ksiar ban shah khot ha ka ban sakhi ia ka jingrakhe I-Day ha Delhi. Haba niew ia ka JJM kum ka sienjam ba wanrah jingkylla jong ka Sorkar, kala ong “Ka JJM kala wanrah jingkylla ia ka jingim ki briew khamtam ki Kynthei ha ka shnong jong nga. Ka shnong jong ngi kala ioh ia ki kor um iing ha u snem 2020. Mynshuwa, ngi hap ban pynlut bun ka por ban leit tong um na ki pung bad ki pukri. Hynrei mynta ka jingim kala kham suk hadien b aka um kala poi beit beit sha ki thliew iing jong ngi lyngba ki kor um ka JJM”.
Uwei pat uba ioh ia ka skhim JJM Jenesiuis Marwei ula pynpaw ia ka jingkmen bad jingsngewnguh ia ka Sorkar halor ka jingshah khot ban sakhi ia ka jingrakhe I-Day ha Delhi. Ula pyntip ba ula ioh ia ka kor um ha Iing ha u snem 2020 bad naduh katei ka por, ula lait n aka jingleit tong um bam um dih na wah. Ula ai khublei ia u Myntri Rangbah Duh ka Ri halor ka jingiohi jngai ia ka buit ban ai kor um bad ban pynpoi ia ka umbam umdih kaba khuid sha man ki thliew iing.
Ka Kong Babiangmon Lapang na Mawphrew, Ri-Bhoi District kaba im ha ka kam rep, kala pynpaw ia ka jingkmen halor ka jingshah khot sha Delhi ban sakhi markhmat ia ka jingrakhe. Haba pynkynmaw ia ki sngi shuwa ban ioh iaka JJM, kala ong ba kane ka skhim kala weng ia ki jingeh na ka jinghap leit tong um na kawei ka tyllong um. “Mynshuwa, ngi hap ban aiknieh um hapdeng ki longiing hynrei hadien u 2020 haba la poi ki kor um ha iing, baroh kine ki jingeh ha kaban ioh ia ka umbam umdih kaba khuid kala kut noh” kala ong.
Ki briew ba shah khot na Ri-lum Garo
Kumjuh ruh, ki nongioh ia ka skhim Amrit Sarovar- Merisuklin Syngkon na East Jaintia Hills, Meduwin Marak bad Delpinna Sangma na East Garo Hills, kila shah khot ban sakhi ia ka jingrakhe I-Day ha Delhi.
U Meduwin Marak na shnong Rongjeng, East Garo Hills ula pynpaw ba u sngew sarong ban long napdeng ki nongshah khot sngewbha sha ka jingrakhe I-Day ha Delhi bad ula ap khmih lynti ban iohsngew ia ka jingkren markhmat jong u Myntri Rangbah Duh ka Ri n aka rynsan jong ka Red Fort. Ula ong ruh b aka Amit Sarovar kala aikam aijam ia u bad ula kmen bha halor kane. U Meduwin Marak bad ka Delpinna Sangma ki dei ki nongri dohkha na East Garo Hills.
Ha kane ka jingleit Delhi jong ki, kine ki nongshah khot kyrpang kin ioh ruh ia ka lad ban leit iuhkjat ha ka National War Memorial bad ka Pradhan Mantri Sangrahalya (Prime Minister Museum) ha New Delhi.
Pule ruh: Pyrshah jur ka JAC ba kam trai ka MeECL ia ki jaka ha thain Sumer namar ka Shillong Western Bypass
