Guwahati, Risaw 22: Ki bor pulit ka Assam kila ioh ban kem noh ia saw ngut ki briew ia kiba la kynnoh ba kidei ki dkhot jong ka kynhun kaba la shah khang pyrshah ka Popular Front of India (PFI) na ki bynta bapher bapher jong ka Kamrup district ka Assam, ong ka khubor heh pulit hynnin ka sngi Thohdieng.
Ia kine ki dkhot ka PFI kiba la shah kem la tip kyrteng kum u Nazrul Islam uba dei na Gagalmari, u Rafikul Islam na Natun Badla, u Hafijur Rahman na Palahartari kaba hap hapoh Nagarbera police station bad u Saiful Islam uba dei na ka thain Tukrapara Goroimari kaba hap hapoh Chaygaon police station kiba hap hapoh Kamrup district.
“Sawngut ki dkhot jong ka kynhun PFI kaba la shah khang pyrshah kila shah kem noh mynta kasngi,” ong u Special DGP (L&W) u GP Singh hynnin ka sngi Thohdieng.
Ka sorkar India ha ka 27 tarik u Nailur ba la dep kala khang pyrshah ia ka kynhun Popular Front of India (PFI) kumjuh ia ki seng bad kiwei pat kiba don ka jingiadei bad kane ka kynhun kum kaba beain naduh katei hi ka sngi bad ka ban bteng san snem kynthih hapoh ki kyndon ain Unlawful Activities (Prevention) Act, 1967.
Ha ka 27 tarik u Nailur ba la dep ki bor pulit kila kem noh ia 25 ngut ki nongialam bad ki nongtrei jong ka PFI kaba la kyntiew halor ka jingdon jong kiba la shah kem na kane ka kynhun sha ka 36 ngut na ki bynta bapher bapher ka jylla.
Da ka jingioh kem biang ia kine ki sawngut, kumta ruh ka jingdon jong ki dkhot ka PFI kiba la shah kem kala kiew sha ka 40 ngut baroh.
