Agartala, Lber 02 : Shi sngi shwa ka jingniew ia ki vote na ka bynta ka ilekshon assembly ha Tripura, na ka liang ki bor pulit ki la ioh ban kem noh ia sawngut ki briew bad ioh kurup ia u kynja u ba shongdor haduh T.3 klur na ki bynta jong ka Ganganagar kaba hap hapoh Dhalai district.
Ki tyllong khubor ki la ong ba kumba ju long man ka sngi, hynnin ka sngi ruh ki pulit ka Tripura ha ryngkat ki dkhot na ka tnat shipai Assam Rifles ki dang pynlong ia ka jingkhynra ia ki kali ha ka surok national highway ha Gandacherra kaba hap hapoh Dhalai district ka jylla hadien ba ki la ioh ban bat noh ia ka kali.
Hadien ka jingkhynra ki pulit ki la ioh ban kurup haduh kumba 2000 kilo u kynja ia kiba la buhrieh ha ki bynta ba shadien jong ka kali hapoh Naka Point jong ka Ganganagar ha Dhalai district.
Ki tyllong khubor ki la ong ba kane ka jingjop ka la wan long hadien ka jingkhynra ba la pynlong da ki bor pulit ka Ganganagar ha ryngkat ki shipai ka Assam Rifles.Ia kitei ki sawngut la aiti noh sha ki bor pulit na ka bynta ban pynlong shuh shuh ia ka jingtohkit.
Kham hadien ki bor pulit ki la ong ba ka dor jong une u kynja ba la ioh kurup ka la kot sha kumba 3 klur tyngka.
