Shillong Lber 23: Uwei u samla ula shah kem ha ki pulit hynne ka sngi halor ka jingdonkti ha kaban pynbthei bomb ha Them Iew Mawlong bad mynta ka jingioh kem ia kiba don kti kala kiew sha ka 4 ngut.
“Ngi la iohkem hynne ka sngi, sa ia briew uba saw, uba donkti ha ka jingpynbthei bomb uba la tip kyrteng kum u Sansharbha Makdoh 24 snem ka rta, ba shong basah ha Umroi, Ri-Bhoi,” la ong u Superintendent of Police ka East Khasi Hills u Rituraj Ravi.
“Ka jingtohkit halor katei ka jingjia kan dang iai bteng ha baroh ki liang” ula ong.
Ha ka 19 tarik u Lber ki pulit kila kem ia u Namphyrnai Lyngdoh Peinlang 21 snem ka rta uba na ka shnong Peinlang bad la kem ia u na Mairang, Eastern West Khasi Hills bad la wanrah noh sha Shillong bad udei uba la suba jur ba udei u donkti hakhmat eh halor katei ka jingjia.
U SP ula pyntip ba u Namphyrnai udei uba don ka jingiadei bad ki dkhot jongka Hynniewtrep National Liberation Council (HNLC) bad ula pynpaw ba ki pulit kin pynngat ia baroh kiba donkti ha ka kam iasylla, kiba donbynta lang, kiba bei tyngka bad kiba pyniaid iaka kam ban pynbthei bomb.
Ha ka 11 tarik u Lber, ki pulit kila kem ia u Bah Tarson Lymba 58 snem ka rta uba dei u nongialam ka HNYF bad la kem ia u na Dawki katba ia u Ebakordor Nongpluh 26 snem la kem na ka thaiñ Malki, Shillong hadien ba kala don ka jingjia jong ka jingpynbthei bomb.
