SHILLONG, Lber 23: Ki pulit ka jylla ha ka sngi Saitjain kila pynmih ia ka jingbthah ha kaba kila kyntu ia kiba shah dawa pisa ha ki kynhun kieng atiar kiba la shah kheiñ be-ain bad kim dei satia ban siew pisa sha kitei ki kynhun.
U Director General of Police (DGP) Dr LR Bishnoi ha ka kyrwoh khubor ula ong, ba ki pulit kila ioh ia ki jingtip ba bun ngut ki briew kila ioh pdiang ia ki shithi dawa pisa na ka Hynniewtrep National Liberation Council (HNLC), Garo National Liberation Army (GNLA) bad kiwei kiwei lyngba ka social media sites/apps (Whatsapp, Telegram/SMS).
Ula ong, ka long kaba donkam ia ki nongshong shnong ban sngewthuh ba ka jingai ia ka pisa ban kyrshan ia ki kynhun kiba la shah niew be-aiñ kadei kaba sniew bad ka jingpynkheiñ ia ki kyndon aiñ.
“Ka jingai jingkyrshan ym tang ba ka nang ai ding ia ki kam be-aiñ bad kiba pyrshah ia ka ri, hynrei ka buh ruh ha ka jingma ia ka jingim jong ki briew kiba lui lui bad ka ktah ruh ia ka jinglong jingman ha ka imlang sahlang. Ka jingdon bynta ha kaban iarap ai pisa ia ki kynhun be-aiñ, kam dei tang ka jingpynkheiñ ia ka aiñ hynrei ka iuhroit ruh iaka jingpyrshang da baroh ban iada ia ka Ri na ki kam pyntriem ki lehnoh bad ki kam be-aiñ ki jongki” la ong u Bishnoi.
U DGP ula maham ia ki paidbah ba kidei ban kiar ban ai kano kano ka jingsiew sha kino kino ki briew ne kynhun bad ula ong ka jingsiew pisa sha ki kynhun be-aiñ kan khring ia ki kyndon jong ka Section 11, 13 & 17 jongka Unlawful Activities (Prevention) Act, 1967 bad kumjuh ia ka Section 4 jongka Prevention of Money Laundering Act bad ka Section 109 IPC.
Ula ong, kiba shah dawa pisa kidei ban pyntip sha ki pulit khnang ba kin ioh leh ia kaba donkam bad yn buhrieh ia ka kyrteng bad ia kino kino ki jingtip shaphang jongki.
