Imphal, Nailur 10 : Ki bor pulit ka Manipur ha ryngkat ka Battalion na Moreh hynnin ka sngi Thohdieng kila ioh ban kem noh ia laingut ki lehnoh kiba dei na ka kynhun seng People’s Liberation Army (PLA) bad ioh kurup ruh ia ki tiar siat bad ki kuli na ki bynta jong ka Moreh hapoh Tengnoupal district ha khappud ka India bad Myanmar.
Katkum ki khubor, la ong ba ki bor pulit hadien ba kila ioh ia ka jingtip kaba thikna halor ka jingdon jong ki lehnoh PLA ha ki bynta khappud jong u pillar no.79 bad 81, kumta ki bor pulit ka Moreh Battalion bad ki pulit ka Manipur ryngkat lang kila pynlong ka jingkhynra bad ioh ban kem noh ia kine ki lehnoh napoh ka shnong Jangnoi kaba hapoh Moreh.
Na kine ki lehnoh ki pulit kila ioh ban kurup ia kawei ka suloi AK rifle, artylli ki pistorl 0.32 bad 14 tylli ki kuli, ong ka khubor heh pulit.Na ka liang u heh pulit ula iathuh ruh ba kine ki lehnoh ki dang pyrshang ban wan rung sha ki bynta khappud na ka bynta ban leh ia ki kam thombor pyrshah ia ki bor pahara.
Ia kine ki lehnoh ha ryngkat ki tiar ba la ioh kurup la aiti noh sha ki bor pulit ka Moreh na ka bynta ban pynlong shuh shuh ia ka jingtohkit.
