Shillong, Iaiong 25: Ki pulit jong ka Nongstoin Police Station bad ka ANTF West Khasi Hills, kila iohkem ia ki arngut bad la ioh kurup ia u drug Heroin uba la don 19.69 gram.
Ki pulit kila pyntip ba ha ka 23 tarik u Iaiong, kila ioh ia ki jingtip ba arngut ki briew kiba kynthup ia u Biangdorlang Lyngdoh Nonglait bad u Morningstar Lyngdoh Rngaid kiba na West Khasi Hills, kila mih da ka thuk thuk (AS-16D-6246) ban leit sha Shillong ban leit thied drug bad kumta ki pulit jong ka Nongstoin Police Station bad ka ANTF kila pynlong ia ka jingpynap shrip ha ka shnong Nongkasen.
Ha kane ka jingpynap shrip la sakhi ia katei ka thuk thuk hynrei haba kine kila iohi ia ka kynhun ki pulit, kila phet noh bak bad hadien kila iehnoh ia ka thuk thuk ha ka shnong Sohphria bad kila phet rieh noh. La pynlong ia ka jingwad ia kine da ka jingiarap jong ki trai shnong bad la ioh ban kem ia u Biangdorlang Lyngdoh Nonglait uba la rieh da kaba shimkabu ia ka jingdum hynrei ula bret noh ia u drug kaba ula rah.
Ha ka sngi kaba bud pat, ha ka por mynstep ki pulit kila iohkem ia u Morningstar Lyngdoh Rngaid na ka shnong Nonbah bad haba kila bteng ban pynlong ia ka jingwad ha ka shnong Sohphria ha ryngkat ka jingdon lang jong ki nongsakhi ryngkat ka jingai jingkyrshan jong ki ksew K9 jongka 4th MLP bad kila lap ia ki artylli ki pla kieng kiba don ia u suba drug uba la thep ha ki artylli ki synduk thep sabon.
Haba la leh ia ka Test la shem ba une u drug udei u Heroin uba don 19.69 gram.
Ki pulit kila kem noh ia u Biangdorlang Lyngdoh Nonglait bad ia u Morningstar Lyngdoh Rngaid bad la ialam sha iingkashari bad la pynngat ia ki ha ki kyndon jong ka NDPS Act bad ka jingtohkit ka dang iaid shakhmat.
