Shillong, Iaiong 25: Kawei ka longkmie kaba 27 snem ka rta kaba dei na Guwahati kaba la jah rngai naduh ka 24 tarik u Iaiong, la lap ia ka ha ka sngi Saitjain ha ka nongbah Shillong.
Kane ka longkmie la tip kyrteng kum ka Bhabana Sarma, ka dei ka ba la lap hapoh kawei ka kamra kaba don ha kawei ka tnad trei kam jong ka State Bank of India, kaba don hajan madan Polo ha Shillong.
Katkum ki khubor, ki nongtrei bank kiba la poi kloi ha katei ka jaka ki la lap ia kane ka longkmie kiba don hapdeng ka jingkhuslai bad ki la pyntip noh sha ki bor pulit.
Ka Sarma ka trei kum ka nonghikai ha kawei ka skul shimet ha Guwahati bad dang shen ka la iehnoh ia katei ka kam.
“Ka kynhun pulit na Guwahati ki la wan poi sha Shillong ban rah noh ia ka.Ngi dang tohkit kumno ka wan poi sha Shillong, ha ka 24 tarik u Iaiong, ka la mih na la iing bad ha kaba nyngkong ka la shim ia ka taksi Uber hynrei kala pynsangeh noh. Hadien kala leit sha Paltan Bazar da kaba bat ia ka kali Rapido. Ia ka case la sdang ban tohkit bad ngin dang bishar bniah ha baroh ki liang,” la ong u wei u pulit ophisar.
U la bynrap, “Shwa ban mih na ïing, ka la ïathuh ha kiba haïing hasem ba ka leit sha skul jong ka ban shim ïa ka tulop kaba dang sahteng.”
Ka Sarma ka la jah rngai ha ka sngi Thohdieng hadien ba la kynnoh ba kala phah khubor sha kiba ha ïing jong ka bad pynpaw ba ka don hapdeng ka jingma.
La iathuh ba ka la mih na ka jaka sah jong ka ha Tetelia bad ka dang don ha lynti ban leit sha Azara ha ka por ba ka phah ia ka khubor ba ka don hapdeng ka jingma, kumta ki bahaïing jong ka kila ujor ejahar ha Jalukbari Police Station, hadien kane ki pulit ki la pynlong ïa ka jingkhynra ban lap ïa ki leit ka wan jong ka.
Katkum ki tyllong khubor, la iathuh ba ia ka jaka ba khatduh ba la tip lyngba ka mobile jong ka, la lap hajan ka thain jong ka Gauhati University shwa ba ka phone jongka, kala paw ba ym lah ban ioh ne Unreachable. Hadien kane ym shym la ioh jingtip shuh tad haduh ba la lap ia ka ha Shillong.
Ha kajuh ka por, ki pulit ki la sdang ia ka jingtohkit halor ki jingjia kiba don ha katei ka kam.
“Mynta ngi dang eksamin ia baroh ki liang. La pyntip sha ngi ba ka jinglong jingman jong ka koit ka khiah ka long kaba biang.Kumno kala poi sha Shillong na Guwahati ka dang don ha ka jingtohkit, kiba ha iing jong ka ruh ki la wan sha Shillong ban wan ialam biang ia ka”, la bynrap shuh shuh une u ophisar.
