Shillong, Iaiong 24 : Kawei ka kali Pulit kaba synran (escort) ia ka kali jong uwei u heh ka NEEPCO, kala shah kawang petrok bomb ha ka kynhun ki riew runar hynne ka miet ha ka thain Demthring, kaba hap hapoh ka Madanrting Police Station.
Kane ka jingjia kala jia ha ka por 7:25 baje eiei ha ka thain Block-2 , Demthring. Kane ka jingjia kala jia ruh ha ka por ba dang don ha jingdheng kali ha ka thain.
Kat kum ka khubor Pulit, kane ka kali Pulit ka dang synran (escort) ia ka kali u Heh ka NEEPCO uba dang mih na Ophis ban leit shala ka jong ka Iingsah kaba don ha Laitkor.
Ki iathuh ba kane ka kali ba shah kawang petrol bomb ka dei ka Thar kaba shong ki Pulit ba synran ia une u Heh Ophisar ka NEEPCO hynrei ki briew ba don ha kane ka kali, kila kloi ka pynlip noh ia ka ding.
Ki Pulit kila register case halor kane ka jingjia bad ka jingtohkit mynta kala iaid shakhmat.
Jia ryngkat kane ka jingjia kala wan jia ruh tang shisngi hadien ka jingshah kem u dkhot ka KSU na Nongthymmai, ia uba la shah kem halor ka jingsuba donkti ha ka jingpyniap ia ki nongbylla bar jylla ha Ichamati, Shella.
