Shah jied ka Saiantist ka USTM ban leh ia ka Research Project ka ISRO

Shillong, Risaw 22: Ka Dr Murchana Khusroo kaba long ka Assistant Professor ka Department of Physics jong ka skulbah University of Science and Technology Meghalaya (USTM), kala shah jied ban leh ia ka Research Project kaba kongsan jongka Indian Space Research Organisation (ISRO) hapoh ka Regional Academic Centre for Space (RAC-S) Programme.

Ka Dr Khusroo kaba shong basah ha Danish Nagar, Jorhat, kala ioh jingmynjur ban leh iaka Project kaba la ai kyrteng “Multi-Spacecraft Investigation of Solar Wind Dynamics Through Solitary Wave Analysis: Insights from Aditya-L1 Mission” kadei kaba nyngkong ha ka thain shatei lammihngi ban pyndonkam ia ki Scientific Data na ka ASPEX (Aditya Solar Wind Particle Experiment) bad MAG (Magnetometer) kaba dei ruh ka solar mission kaba nyngkong, Aditya-L1.

Ka Dr Khusroo kan trei ruh kum ka Principal Investigator (PI) da ka jingiatreilang bad ka Physical Research Laboratory bad ISRO halor katei ka projek.

Kane ka jingwad bniah ne Research ka thmu ban tohkit bniah shaphang ka Solar Wind Dynamics hapoh jong ka Heliosphere, da kaba pynleit jingmut ia ka rukom treikam bad ban kyntiew shuh shuh ia ka jingsngewthuh ha kaba iadei bad ka Solar Wind Turbulence bad Space Weather Phenomena. Kane ka iaid ryngkat bad ka thong kaba hakhamt jong ka Aditya-L1 Mission.

Ka Dr Khusroo kala pynpaw ia ka jingsngewnguh da kaba ong, “Ka long ka kabu kaba khraw ban noh synniang sha ka Solar Mission jong ka ri India bad ban mihkhmat ia ka thain shatei lammihngi ha ka rynsan jong ka ri ha kaba iadei abd katei ka phang jong ka jingstad saian”.

U Chancellor ka USTM u Mahbubul Hoque ula ong, “Ka jingjop jong ka Dr Murchana ka long ka jingsngew sarong kaba khraw ia ka USTM bad ia ka thain baroh kawei. Ka pyni ia ka jingkular jingmut ha kaban kyntiew ia ki kam wad bniah bad ki jingelh ia ki kam kiba long thymmai kiban noh synniang sha ka ri India ha kaba iadei bad ka jingstad bad ka jingkiew shaphrang ha ka liang ka Science bad Technology”.