Cachar, Lber :Ha kawei ka jingjia kaba pynkyndit ia kiba bun balang, uwei u khynnah uba dang 13 snem rta u la shah bom iap ha u marjan tang namar ka jingialehkai game ha ka mobile phone hapoh Cachar district ka Assam mynta ka sngi.
Katkum ki tyllong khubor la iathuh ba ia une u lanot la tip kyrteng kum u Panna Nath uba shong ba sah ha ka thain Jaraitola kaba hapoh Borkhola.Une u khynnah u dang myllen ban ialehkai game ha ka mobile phone hapoh ka iingsah ki para marjan hadien ba uwei uba la shah kynnoh donkti u Deepak Nath u la kyntu ia u ba un sangeh noh.Hynrei hadien ba kala mih ka jingiania kaba jur.Na ka liang kiba haiing jong une u lanot ki la ong ba u Deepak u la thombor tyngeh ia u kat haduh ba un da khlad noh.
Ka kmie jong u Panna ka la wan poi ha katei ka jaka ba la jia bad pynkit noh ia u mardor shapoh hospital hapdeng ka jingmynsaw kaba jur.Hadien ba la eksamin ki staff jog ka hospital ki la pynkynriah noh ia u shapoh Silchar Medical College and Hospital (SMCH) ban ioh ia ka jingsumar kaba kham biang shuh shuh.
Hynrei, hadien ba la wan poi hapoh kane ka jaka sumar, na ka liang ki doktor ki la pynbna ba u la dep khlad noh.Halor kane ka jingjia na ka liang u kpa jong utei u lanot u la ujor pyrshah ia u Deepak Nath hapoh Borkhola Police Station.
Na ka liang ki bor pulit ki la sdang ban pynlong ia ka jingtohkit halor kane ka jingjia kumba la ujor.Kane ka jingjia ka la wanrah ruh ka jingkhihwin kaba jur ha katei ka thain.
