Guwahati, Lber 22: Ka Assam Legislative Assembly hynnin ka sngi ba Ar ka la mynjur ia ka rai ban pynpaw pyrshah ia ka documentary jong ka BBC kaba la ai kyrteng ‘India: The Modi Question’ kaba ktah mationg bad buh jingma shibun bad dawa ruh ban pynshitom ia kiba don bynta ha ka jingpyllait ia kane.Ia kane ka jingshim rai la mynjur wat hadien ka jingmih noh ki liang pyrshah bad hadien ka jingiatai halor kane ka jingshim rai hapdeng u Myntri Rangbah (CM) Himanta Biswa Sarma bad u nongialam liang pyrshah u Debabrata Saikia.
Ia kane ka jingshim rai la wanrah da u MLA ka BJP u Bhubon Pegu lyngba ka Private Members’ Resolution ha kaba la kynnoh ba ka BBC ka la buh jingkylli ha kaba iadei bad ka jinglaitluid jong ki lad pathai khubor ha India, ka jingtreikam jong ki iingbishar bad halor ka synshar khadar jong ka sorkar ba la jied da u paidbah ha ki artylli ki bynta jong ka documentary film.
Kham hashwa na ka liang ka assembly ka Gujarat bad Madhya Pradesh ruh ki la shim ia ka rai ban pynpaw pyrshah ia kane ka documentary jong ka BBC.
Haba aijingkyrshan halor kane ka jingshim rai, na ka liang u CM ka Assam u Himanta Biswa Sarma u la ong; “Ka iingbishar Supreme Court ka India ka la pynksan ia u Myntri Rangbahduh (PM) Narendra Modi ha kaba iadei bad ki jingiaumsnam kiba la jia ha ka snem 2002 ha Godhra da kaba shim ba ki jingkynnoh pyrshah ia u ki dei ki jingiasylla kam sain hima…Ka BBC ka la pyllait ia katei ka documentary ha ka por ba ki nongmihkhmat jong ka kynhun G20 ki la don ha Assam.Ka por ha kaba la pyni ia kane ka documentary ka la dei ban wan long hashwa jong katei ka jingshim rai jong ka SC.”
Kham hadien u Sarma u la pynpaw lyngba ka twitter da kaba ong: “Ka Assam Assembly ka la shim ia ka rai ban pynrem jur ia kane ka documentary kaba pynthohbria ia kaba la pyllait dang shen da ka BBC.” Ka iingdorbar ryngkat lang ka la dawa ban shim ka jingpynshitom pyrshah ia kito kiba donkti ha kane ka kam pynbudnam.”
Katba na ka liang ki MLA ka liang pyrshah ki la pynpaw pyrshah da kaba ong ba ia kane ka phlim la dei ban pyni shwa hapoh ka iingdorbar hashwa ban iamir jingmut bad ban shim ia ka rai.
Na ka liang u nongialam liang pyrshah u Debabrata Saikia u la kynthoh tyngeh ia ka sorkar bad ong, “Kane kan ktah ia ka jinglaitluid jong ki lad pathai khubor bad ia ka jinglaitluid ban pynpaw kiba dei ki hok ba la pynkhamti katkum ki riti synshar khadar ne constitution jong ka ri India.”
Shuh shuh na ka liang u C|M Sarma u la pynpaw pyrshah ia kane da kaba ong ba ki hok ki dei na ka bynta ki nongshong shnong jong ka ri India ym na ka bynta ka BBC.
