Shillong, Naitung 02 : Ka iingkashari hynne ka sngi Balang kala hukum ban set hapoh ka Judicial Custody sa ia ki 3 ngut kiba shah kem halor ka jingpynduh ia ki sabut ba iadei bad ka jingshah pyniap u nongkhaii na Indore u Raja Raghuvanshi.
U Shilom James ula ngat ha ka hukum ban set 14 sngi ha ka Judicial Custody, katba u Lokendra Singh Tomar bad u Balbir Ahirwar kila ngat 7 sngi hapoh ka Judicial Custody, la pyntip u nongiasaid ain u T Chanda.
Ia kine ki lai ngut la ialam tian bishar hakhmat ka Iingkashari hadien ba kut noh ka Police Custody ba hynriew sngi.
Kine kila shah tian bishar ha ka 26 tarik u Jylliew halor ka jingkynnoh ba kila donbynta ha kaban iarap ia ka suba nongpyniap kaba hakhmat eh, da kaba ai jaka rieh bad ka jingpyrshang ban pynduh pyndam ia ki sabut kiba kongsan.
