Shillong, Oct 18: Ka kynhun ialehkai cricket ka Meghalaya kila ioh khur ia ka jingjop ba nyngkong ha ka Senior Women’s T20 Trophy da kaba lah ban pynliem suk ia ka kynhun ialehkai ka Nagaland da 9 wicket ha Bangalore hynne ka sngi ba-ar.
Ka Meghalaya kala jop ia ka jingkynting pisa bad kala phah tied nyngkong ia ka Nagaland kaba la lah ban kamai 112 run bad hap 5 wicket ha ka 20 over.
Ka Ajima Sangma kala ioh ban shim haduh 3 wicket bad ai kamai 34 run bad ruh ka Rubi Chettri kaba la kawang lai over bad ai kamai tang 3 run bad shim shi wicket katba ka Debasmita Dutta kala shim shi wicket bad ai 19 run.
Ha ka jingbeh thong, ka Sejal Raut bad ka Dutta kila iatied bha para ma ki haba tied sdang bad ioh ban kamai haduh 74 run shuwa ba ka Dutta kan hap wicket hadien ka jingkamai 29 run na ki 27 tylli ki bol bad kynthup ia 4 tylli ki 4.
Ka Raut kala bteng ban ialehkai bha tad haduh ka jingpynthut noh ka suin bneng. Ka Meghalaya kala lah ban kamai 82 run bad hap shi wicket kaba la tam palat ban ia ka thong bala pynkylla, kaba long 79 run.
Ka Meghalaya mynta kan iakynduh biang sa ia kawei ka kynhun ialehkai na ka thain Shatei Lam Mihngi ha ka sngi palei. Kane ka kynhun ka dei ka Mizoram.
