Shillong, Risaw 18: U Chairman ka Mawmluh Cherra Cement Limited (MCCL) Bah Wailadmiki Shylla ula pyntip ba un sa hiar sha Kolkata lashai ka sngi Balang ban leit jurip ia ka karkhana jong ka Bhavika Commercial Private Limited (BCPL) shuwa ban rai khatduh ia ka Joint Venture ban pyniaid ia ka MCCL.
Ia u Bah Wailadmiki yn synran da ka kynhun ki Ophisar ka MCCL.
Haba iakren bad ki nongthoh khubor, u Bah Wailadmiki ula ong baka BCPL ka dei kawei na ki lai tylli ki kompani kiba la iashimbynta ha ka Expression of Interest (EoI) bala pynmih da ka Sorkar Jylla.
“Katba arngut kila rai ban kynran dien noh, tang ka BCPL kala wan shakhmat bad ki jingbatai ba bniah ia ka plan kumno ban pynim pat ia ka MCCL kaba ishong nongrim bha” ula ong haba bynrap “Lashai, ngan leit hiar sha Kolkata ban pynthikna la ka BCPL ka dei shisha ne em ka kompani pynmih dewbilat”.
U Chairman ula ong ba mardor hi yn sa aiti ia ka kaiphod halor kane ka kam sha u Myntri Rangbah ka Jylla. “Ia kane ka kaiphod yn da rah sha ka jingialang jong ka Kynhun Myntri ba kan ai jingmynjur khnang ba ngin lah ban sdang noh ia ki kam ban iatehkular bad ka kompani” ula bynrap.
Kat kum ka jingong jong u, ki don palat ia phra tylli ki kompani kiba la thep kyrteng ha ka EoI.
Ha ka 19 tarik Naitung 2021, ka Kynhun Myntri kala mynjur ia ka jingtyrwa jong ka Tnad ban pyniaid noh da ka Joint Venture bad ki kompani shimet ba kin pyniaid ia ka MCCL.
Ia kane ka rai la shim hadien ba ka Sorkar Jylla kam lah shuh ban kynshew pisa haduh T. 190 klur ban pynkhie im ia ka MCCL namar ka jingkyrduh pisa.
U Bah Wailadmiki ula ong ba shuwa ban shim ia kane ka rai, ka Sorkar kala phah ia ka kynhun ban leh ia ka survey ba bniah ba kumno ban pynim pat ia kane ka karkhana pynmih dewbilat ka Jylla.
“Nga khmih lynti ba kane ka Joint Venture kan long kaba seisoh bad ban gin lah ban pynim pat ia ka MCCL” ula ong.
Haba kylli, u Chairman ula ong ba ka hok longtrai kan iai neh beit bad ka Sorkar Jylla. Ka bhah jong ka Jyla kan long 51% bad ka kompani shimet kan long 49%.
