Shillong, Risaw 14: Ki thei ialehkai cricket ka Meghalaya ki la lah ban pynliem ia ka Nagaland da 5 wiket ha ka Senior Women’s T20 Trophy plate group ba la long ha Agartala mynta ka sngi, kane ka jingjop ka la wan hadien ba ka kynhun ki thei ialehkai ka jylla, kim shim la ioh lad ban mih madan, na ka daw ka jingbym da biang bad tikna bha ka suinbneng, hynrei ha ka jingiakhun kaba mynta ka sngi, ka kynhun ka la sei ia ka buit ka bor ka jong ka ban da lah ban khur syndon ia ka jingjop.
Haba phai sha kane ka jingiakhun ha ka por ia kynting pisa (toss) la jop ia ka da ka Meghalaya kiba la ailad ia ka Nagaland ba kan tied nyngkong ha kaba ka la lah ba kan kamai tang 74 ron hadien ba ka la hap noh 7 wiket na ki 20 over, ka Solina Jaba ka la lam khmat ia ka kynhun ban khur 3 wiket naka bynta 14 ron na ka bhah jong ka 4 over bad bynrap lang sa ka Rubi Chetri (1/10 na ki 3 over) bad ka Debasmita Dutta (1/13 na ki 4 over), katba na ka liang ki nongtied ka Nagaland ka Najmeen Khatun, ka la lah ba kan kamai 19 ron.
Haba la dei pat ka pali ban wan beh ia kane ka thong, ka Debasmita, ka la lah ba kan lam khmat ia ka kynhun hadien ba ka la lah ba kan kamai 31 ron kaba la wan na ki 47 tylli ki bol bad bynrap lang da ka 18 ron na ka Suriti Kumari Ray, ban seng ia ka nongrim kamai paralok kaba 44 ron.
Hadien kane ka Rubi ka la kamai 16 ron na ki 21 tylli ki bol ban lam khmat ia ka Meghalaya ban jam sha u line ka jingjop.
Ha kaba kut ka jingiakhun ka Debasmita ka la ioh ba kan rah ia ka khusnam Player of the Match.
Ka jingiakhun kaban wan ia ka Meghalaya kan long ia ka Mizoram ha ka sngi Balang ka taiew.
