Shillong, Lber 14: U nongwad Right to Information (RTI) bah Disparsing Rani hynne ka sngi ula kam ba ki don haduh 134 tylli ki kam kiba lait ha North Eastern Hill University (NEHU) bad 10 tylli ki kam ki lait ha Institute of Hotel Management (IHM).
Haba kren sha ki lad pathai khubor u bah Disparsing ula ïathuh ba ha NEHU nalor ka jingdon ki nongtrei Casual Workers bad ki Contractual Workers ki ba la siew ha ki lai bynta, naka liang ka skulbah kam shym la lah satia ban pyndap iaki kam kiba lait haduh 134 tylli.
Nalor kane u bah Disparsing ula kynnoh ba ka tnat pule Department of Journalism and Mass Communication kam shym la don ïa ki tiar ki ba biang ha kaba ïadei bad ki practical ban ai jinghikai sha ki khynnah.
U bah Disparsin ula ong ba ka Institute of Hotel Management (IHM) kaba hap hapoh ka Ministry of Tourism ka sorkar India ka don bun ki kam ba lait thylli kynthup ia ka post jong u Principal, Assistant Administrative Officer, Office Superintendent, Lecturer, 2 tylli ki post Assistant Lecturer, Teaching Associate, LDA bad kiwei kiwei.
Nalor kane u bah Disaprsing ula iathuh ba katkum ka kaiphod jong ka RTI bala ioh na ka Hindustan Petroleum Corporation Limited (HPCL), haduh mynta ka jingsam ei iaki LPG Gas kaba khlem kano kano ka jingsiew hapoh ka ri bad ha Meghalaya ka dang iaid beit.
U bah Disparsing ula ong ba ula pan RTI namar ki don ki Gas Agency kiba la pan pisa naka bynta ban ioh ei iaki LPG Gas.
U bah Disparsing la ïathuh ruh ba katkum ka jingïakren jong u bad ka Longkmie Gas Agency kaba don ha Laban, ki la ïathuh ïa u ba la pynsangeh shwa ïa kane ka skhim, hynrei kim shym la pynshai na kino ki daw ba la pynsangeh.
“Ka kaiphod jong ka RTI bala ioh naka Hindustan Petroleum Corporation Limited (HPCL) ka kren ba ki briew kim donkam ban siew pisa na ka bynta ban ïoh ïa kane ka skhim bad dei namar kane ki Gas Agency ki dei ban pynshai halor ka daw ka jingpynsangeh ïa kane ka skhim” la ong u bah Disparsing.
