Shillong, Iaiong 15 : Ka National People’s Party (NPP) kala sei madan ia ka jingkynnoh jyrsieh thied jaka jong ka Khasi Hills Autonomous District Council (KHADC) ha Mawkyrwat, hapoh ka jingpyniaid jong u President ka Voice of the People Party (VPP) Bah Ardent M Basaiawmoit, mynba u dang long u Chief Executive Member (CEM) ka Council.
Ia kane la kynnoh da u Nongialam ka NPP bad MDC ka KHADC Bah Bajop Pyngrope ha ka rynsan ialap elekshon ban pan jingkyrshan ia ka kyrtong Kong Ampareen Lyngdoh kaba long hynne ka janmiet sngi Nyngkong, ha Umlyngka.
Une u MDC ula sei paidbah ruh ia ka dulir sale deed kaba don ia ka jingsoi kyrteng jong u MLA ka Nongkrem Bah Ardent M Basaiawmoit kum u Nongsakhi na ka bynta ka Executive Committee jong ka Council.
“Kane ka dei ka sale deed jong ka kam iadie iathied jaka ha Mawkyrwat. Ngam thok ia phi bad phi lah ban pan da ka RTI na ka KHADC ban pynshisha” ula ong haba kynthoh jur ia ka jingujor ejahar u Bah Ardent ia uwei u nongialam ka NPP uba dei ruh u MDC barim ka KHADC.
Kat kum ka jingong jong u, ka KHADC kala thied ia ka jaka ha Mawkyrwat ha u snem 2014, ha ka dor ba T.35,24,039. “Kane ka dei ka sale deed bad ngam ialam bakla, ngam thok re”.
Haba kynthoh ba ka jingujor ejehar u bah Ardent ka dei tang ban ialam bakla ia u paidbah, une u MDC ula ong “ Ka sale deed kala kren shai bala dep siew lut ia ka pisa pynban ha u snem 2022, ka KHADC kala leit ban shimti ia ka jaka na u trai hynrei une u trai jaka u khlem shah satia ia ka Council da kaba aidaw ba u khlem pat ioh ia ka pisa”.
“Ka Council kala leit ha u bnai Naitung 2022 ban shimti noh ia ka jaka bad u trai jaka ula iadonlang ha ka jingia jurip pynban u khlem shah ban shimti” ula kynnoh haba bynrap “Ha u snem 2023 ruh, ka KHADC kala leit ban jurip ha ka jingiadon lang u MDC ka Mawkyrwat hynrei u trai jaka u khlem wan mih shuh. Ngi la shem ba une u trai jaka u dei u paralok ba iaieid iajan bha bad u President ka VPP”.
U Bah Bajop ula kynnoh ba une u trai jaka u dei uba la mih aireng teng ia ka elekshon MDC na ka HSPDP na Mawkyrwat ha ka por ba u Bah Ardent u dang don bad ka HSPDP.
Une u Nongialam ka NPP ula ong “Ka jingujor ejahar mynta lei kala nang pynsuk ia ki Pulit ban pynlong ia ka jingtohkit ban top kumno ki sei ia ka pisa. Nga ialade nga tip lut namar nga la iakren bad ki Ophisar ka KHADC”.
Halor kine kiei kiei, u Bah Bajop ula kyntu ia ki paidbah ba kin pynshong nongrim bha ia kine ki briew kiba kdew kti ia kiwei bad kiba sngew khuid hynrei “ialade ki kyrsum ha ka jyreish kaba ngi don bad ki sakhi”.
“Ka party VPP ka iaid sharum shaneng ban bein ym tang ia ka NPP hynrei ia ka Congress, BJP, ki bein lut ia baroh ki party…kumta paidbah long kiba stad” ula ong.
Une u Nongialam ka NPP ula buh ruh ia ki paidbah “Lada ka VPP ka poi sha ka thong bad no kan leit iatreilang ha Delhi. Sa pynshong nongrim bha phi ki paidbah”.
 kala sei madan ia ka jingkynnoh jyrsieh thied jaka jong ka Khasi Hills Autonomous District Council (KHADC) ha Mawkyrwat, hapoh ka jingpyniaid jong u President ka Voice of the People Party (VPP) Bah Ardent M Basaiawmoit, mynba u dang long u Chief Executive Member (CEM) ka Council.){kind=link}