Shillong, K’lyngkot 14: U Nongialam ka Congress Rahul Gandhi ula sdang hynne ka sngi U Blei ia ka ‘Bharat Jodo Nyay Yatra’ na Khongjom War Memorial kaba don ha Thoubal district, Manipur.
Ka Yatra (rally) kan iaid ia ka jingjngai ba 6713 Km ha ki 67 sngi, ba kynthup ia 110 tylli ki District ha ki 15 tylli ki Jylla bad kan kut ha ka 20 tarik u Lber ha Mumbai.
Ka Congress ka ong b aka ‘Bharat Jodo Nyay Yatra’ ka dei kaba la thmu ban pynkhie im pat ia ka nongrim ka jingbishar hok, ka jinglaitluid, ka jingialong kawei kumba la pruid dak ha ka Riti Synshar ka Ri.
“Ngi sngewthuh ia ka jingpangnud jong ba ki paidbah ka Manipur kila mad. Ka Manipur kala duh noh ia kaei kaba ka ieng namar ka jingleh politics jong ka BJP-RSS bad ka jingiashun kaba ka pynsuhthied. Ngin wanrah pat ia ka jingsuk, jingshngain bad ka jingia burom mar kylliang kaba ka Jylla kala paw” ong ka Congress ha ka X hynne ka sngi U Blei.
Haba kren ha ka Rally, u Rahul Gandhi ula ba ka Ri kala iaid lyngba ki jingleh bym hok jong ka Sorkar BJP kaba kane ka Rally ban long hapoh ka Ri kan kren.
Ula ong ruh ba ka long ka jinglehrain ia u Myntri Rangbah Duh ka Ri Narendra Modi, uba khlem pat leit ban iuhkjat ha Manipur wat hadien 8 bnai ba iaid ki kam umsnam bad thma iapher Jaidbynriew hapoh ka Jylla. “Ka bor synshar kala pheil ha Manipur, lehrain ba u PM Modi u khlem pat leit iuhkjat ha Jylla” ula ban jur.
Shuwa ban sdang ka Rally, u Rahul Gandhi ula leit buh syntiew ha Khongjom War Memorial, ban kynmaw burom ia ki riewshlur ka thma Ango-Manipuri.
Kaba kongsan tam jong kane ka rally ka dei ka Bharat Jodo Yatra Bus, ka ban pyndonkam da u Rahul Gandhi bad ki nongialam ka Congress ba bud ia u, ban pyndep ia kane ka yatra.
Ha ka ‘Bharat Jodo Yatra’ bala dep, u Rahul Gandhi ula iaid haduh 3000 Km da ka kjat na Kanra Kumari sha Srinagar.
