Guwahati, K’lyngkot 14 : Haduh 15 ngut ki briew kila mynsaw ha ka jingiakynad kaba mih hapdeng ki kynhun na ki ar Jaidbynriew ha Namsai, Arunachal Pradesh hynnin ka miet sngi Saitjain.
Kat kum ka khubor, ia kine kiba mynsaw baroh la pynkit sha AMCH ba kin ioh ia ki jingsumar.
U Superintendent of Police ka Namsai ula pynthikna ia kane ka jingjia bad ong ba ka jinglong jingman mynta kala kham jai jai. U pyntip ba la pynjari ruh ia ka kyndon 144 CrPC ban tehlakam ia ka jinglong ka suk ka sain ha ka thain.
“Ngi la shim ia baroh ki sienjam ban tehlakam ia ka jinglong jingman. Mynta ka jinglong jingman ka la kgam jai jai” ula ong.
Ka khubor bha iathuh ba ka jingiakynad kala jia hapdeng ki samla Adivasi bad ki samla Khamati. Kane kala sdang da ka jingiania hynrei hadien kala poi sha ka jingiashoh iadat.
“Ha kane ka jingkynad kala mih ruh ka jingsiat pistol. Kine ki arkynhun kila pyndonkam da ki wait bad ki suloi ha kane ka jingiakynad” ong ka khubor.
Na ka liang ki bor District ka Tinsukia kila pynmih ia ka jingbthah ia baroh ki nongleit pilgrim ba kim dei ban iaid lyngba ka Kakopathar-Dirak Gate route ban poi Parshuram Kund tad haduh da pynmih da kawei pat ka jingbthah.
La bthah ia ki ba kin iaid noh lyngba ka lynti na Doomdooma-Rupai Siding-Talap-Sunpura, Doomdooma-Rupai Siding -Talap – Chapakhowa – Shantipur Gate – Roing ban poi sha ka jaka ba ki kwah leit pilgrim.
