Shillong, Jylliew 26: Ka National People’s Party kaba synshar mynta ha Jylla, kala sdang ban pynkhreh ia ka elekshon MLA ban long ha Jylla ha u snem 2023 bad pyntip ruh ba ka party kan mih iakhun marwei ha kane ka lympung ym ban iatehlok bad kiwei pat ki seng sain pyrthei.
“Ngi kwah ban ioh ia ka simple majority-kane ka dei ka jingpynkhreh jong ngi” ong u National Vice President bad Symbud Myntri Rangbah ka Jylla Bah Prestone Tynsong haba iakren bad ki nongthoh khubor ha ka sngi thohdieng.
U Bah Prestone ula ong b aka NPP kala jied ban iakhun marwei bad kam kwah satia ban iatehlok badno bad no ruh ha kaban iakhun ia ka elekshon 2023.
Haba kylli la ka jingsngew ban shah pynrem noh ki MLA ba mynta (anti-incumbency) kan ktah ia ka thong jong ka NPP, u Bah Prestone ula ong “Ia kane hi, ngi ieh ha ki kyrtong jong ngi. Ngan ym iathuh ia phi, Ngan iathuh tang ia ki kyrtong ka NPP ba kumno kin iaid bad ban pynshai sha ki paidbah”.
U Symbud Myntri Rangbah ula ong b aka NPP kam don por satia ban kynthoh kylla ia ki jingiaid ialap pyrshah ia ka Sorkar namar ka jingpynleit jingmut jong ka party hi ka long ban jop ia ka elekshon.
“Haba kut hi, ki paidbah kin sngewthuh kaei ka NPP bad kiwei ki seng sain pyrthei ha Meghalaya. Ki tip mano ba dei ki kyrtong. Ta ka daw, ngkm kwah ban shu pynlut por kai ha kaba kynthoh pyrshah ia ki jingkynnoh naba ngi la pynleit jingmut mynta ba kumno ngin ioh ia ka jingjop ha ka elekshon bad ban ioh ia ka simple majority” ula ong.
Haba kylli, u Bah Prestone ula ong b aka NPP hi kam pat iakren satia mano ban long u kyrtong sha ka shuki Myntri Rangbah ka Jylla.
U Bah Prestone ula pynkynmaw ruh ba ha Meghalaya, dei ki paidbah kiba jied ia u kyrtong kat kum ka jingmon jong ki ym ba ki jied ia ki party.
“Hangne ha Meghalaya, ka iapher bha bad kiwei ki jaka hapoh ka Ri. Ta ka daw ba manla ka san snem, ki kyrtong shimet ki ju jop, lem kumta balei kine ki kyrtong shimet ki jop lada ki paidbah ki peit ia ka party” ula ong.
