Pyniap u samla iala ka jong ka baieid ba jur ka jingtharai sniew

Date:

Share post:

Hadien 2 bnai lap ia ka metiap bala tep ha khlaw

Tura, Jylliew 26: Ha kawei ka jingjia pyniap briew ba sngew shyrkhei, kawei ka samla 19 snem ka rta kaba jah rngai na sor Tura mynta la arbnai, kala shah pyniap hala u jong u samla tang namar ka jingshah tharai sniew ba ka ia iaid samla shawei ruh.

Ia ka metiap jong kane ka samla la lap ba la tep ha kawei ka jaka khlaw ha North Garo Hills da ka jingialam lynti une u samla ba pyniap uba la shim ia ka jingiarap jong uwei u Khynnah.

Ia kane ka jingjia la lap da ki Pulit ka West Garo Hills kiba la thaw ia ka Kynhun tohkit hadien ba ki bahaiing hasem jong kane ka samla ba kyrteng ka Neha G Momin, kila buh ia ka jingujor ba jah rngai hapoh ka Women Police Station ha Tura myn ha ka 20 tarik Iaiong 2022.

Iaka metiap jong ka Neha la lap hynnin ka 25 tarik Jylliew na thliew jingtep ha Sono Chiring kaba don marjan ka Wah Didram ha Bajengdoba, North Garo Hills.

“U Nongpyniap ula shah kem ryngkat bad uwei pat u khynnah ba iarap bad ngi la ioh tam ruh ia ka metiap jong kane ka samla” ong u VS Rathore, Superintendent of Police ka West Garo Hills uba la khmih ia ka jingtohkit ban sei madan ia ka jingshisha ha lyndet ka jingjah rngai jong kane ka theilud.

Ha ka jingtohkit, ki Pulit kila ithuh ia u samla jong ka u Solesh R Marak uba la pyni ia ka jingkhuslai halor ka jingjah rngai jong ka bad kam ruh sha kiba bun ki briew ba katno u sngew tmang ban nym iakynduh ia ka bad ba um don jingtip ruh shano ba ka don.

U Solesh ula buh ruh ia ki jingthoh ha ka Facebook ban pyni ia ka jingsngewkhia bad jingsngewsih halor ka jingjah kane ka samla.

Baroh kine ki arngut kata ka Neha bad u Solesh ki dei na ka thain Bajengdona bad kila ia sah ha Tura ban bteng ia ka jingpule jong ki. U Solesh dang shen ula ioh rung klas ha kawei ka College ha Tura hadien ka jingtap eitmiaw ia kane ka jingjia.

Ka jingtohkit jong ki Pulit kala lap ba kine arngut ki don ia ka jingiadei ba kynrum kynram bha ha ka por ba jah kynsan kane ka samla. Kila lap ruh ba ym don satia ka jingsuba shah rahbor ne shah dawa pisa bad ka mobile jong ka ruh kam shym la meh shuh naduh ba jah rngai.

Ka jingtohkit kala pynsuba jur ia une u samla bad na ki sakhi ba ioh lum, ki Pulit kila kem ia u Solesh R marak na Bajengdoba ha ka 22 tarik u Jylliew. Hadien kane, kila kem pat sa ia uwei u Khynnah uba la iatakhuh bad ka ain.

Ka dei ha ka por ba tohkit ba u Solesh ula kubur ba u don ka jingiadei shi samla bad ka Neha la 2-3 snem hynrei ka jing tharai sniew kala wan ha u ba ka Neha ka dang ia iaid samla bad uwei u shynrang nalor jong u.

U Solesh ula phla ba ula khot ia une u Khynnah ban iarap syntiat ia ka leit ka wan jong ka Neha bad namar ka jingnang jur ka jingtharai sniew, u Solesh ula rai ban shu pyniap noh ia kane ka samla.

Ban lait na ka jingiohi briew, u Solesh ula phah wan ia ka Neha sha Bajengdoba ba un iakynduh ia ka bad ban iapynshai ia baroh ki jingiasngewthuh bakla. Kane ka samla khlem ka jingpyrkhat eiei ruh em, kala mih na Tura ban leit iakynduh ia u Solesh ha Bajengdona khlem da tip ba u Solesh u don da kawei pat ka jingmut kaba sniew.

Ka dei ha kane hi ka miet ba ka iakynduh ia u Solesh ba kala shah pyniap ha kine ki arngut bad ia ka met jong ka, la tep ha kawei ka jaka khlaw ha Sona Chiring.

Hadien arbnai, kala shimpor palat 24 kynta ia ki Pulit ban wad ia kane ka jaka tep da ka jingialam lynti jong u Solesh. Ia kane ka metiap bala kem pyut la lap na ka jaka ba jngai tang kumba 1 km na ka Iingsah jong u Solesh Marak kaba don marjan ka Sona Chiring.

Ki Pulit kila ioh ruh ban lum ia ka sakhi ba kongsan bha ha kane ka sngi bad kane ka dei ka phone jong ka Neha kaba la lip naduh ka miet ba ka iakynduh ia u Solesh. Ia kane ka phone la lap bala tep hajan jong u post elektrik kaba jngai kumba 100 meter na ka iing jong u Solesh.

Ia ka metiap la rah noh sha Tura ban pyndep ia ka Post Mortem bad ki Pulit mynta ki dang pynbteng ia ka jingtohkit ba kin lah ban aiti noh kham kloi ia ka chergesheet sha ka Iingkashari.

Share post:

spot_img

Popular

More like this
Related

Hukum ka Iingkashari ia ka Sorkar ban bud ia ki kyndon ban wanrah jingkhuid ha pung Umiam

Shillong, Rymphang 24 : Ka Iingkashari Meghalaya High Court...

Govt to issue notification on age limits for jobs soon

SHILLONG, FEB 26: Chief Minister Conrad K Sangma on...

Shen yn pynmih jingpynbna ka Sorkar halor u pud rta ioh kam

Shillong, Rymphang 26 : U Myntri Rangbah ka Jylla...

Yn pynlong jingiakhih ki ar seng namar ka jingslem ban pynmih ia ka resol DSC

Nongpoh, Rymphang 26: Ka Ri Bhoi People’s Council (RBPC)...