Shillong, Naiwieng 1: Ki san tylli ki sengbhalang hynne ka sngi ba-ar kila sdang iaka jingiakhih ka jong ki bala ai kyrteng ka “Save Hynniewtrep Mission” ha kaba kila leit ban ialum hajan ka Meghalaya Secretariat ban pynsngew iaki jingdawa ki jong ki.
Kine ki sengbhalang ki kynthup ia ka HYC, HANM, CORP, EJNC bad JSM.
Kine sengbhalang watla ki tip ba kala don ka jingpynjari iaka 144 CrPC da ki bor district hynrei kila mih bad pynkhein ia ka hukum da kaba leit ban ialum paidbah ha IGP ban pynsngew iaki 9 tylli ki mat jingdawa.
Ki jingdawa jong kine ki sengbhalang ki kynthup ia ka jingpyntreikam noh ia ka Inner Line Permit, ban pynrung ka ka ktien Khasi ha ka khyrnit ba phra jong ka riti synshar ka ri, ban pynkynriah noh ia ka Them Metor bad ban bishar thymmai ia ka MOU bala iasoi hapdeng ka Meghalaya bad Assam kaba iadei bad ka jingpynbeit pud jing ka wat ba nyngkong halor ki hynriew tylli ki jaka ba kajia
Watla ki majistor bad ki pulit kila pynsngewthuh ba la pynjari iaka Section 144 CrPC bad la mana pyrshah ban lum palat iaka 5 ngut hynrei ki nongialam sengbhalang kila pynpaw ba ka jingmih ka jong ki kadei ban dawa iaka hok bad ban iakynduh ia ki Myntri Sorkar ym ban thaw ia kano kano ka jingklumar.
Hadien katto katne por ki 5 ngut ki nongialam jong ka HYC, HANM, CORP, EJNC bad JSM kila leit ban iakynduh ia u Myntri Kam Pohiing ka jylla ban pynsngew iaki mat jingdawa jong ki.
Ha kane ka jingiakynduh ia u Myntri kam Pohiing, kine ki san tylli ki Seng kila pynpaw ia ka jingbym sngewtynnad ia kaei kaba mih na ka jingiakren. “U Rymbui u khlem lah ban shim ia kano kano ka rai namar kine ki ishu ki iadei kam bad ka Tnad Political, ka bym dei satia hapoh ka jingkhmih jong u”.
Haba iakren bad ki nongthoh khubor, u General Secretary ka HYC samla Roykupar Synrem ula ong ba u Symbud Myntri Rangbah Bah Prestone Tynsong ula kyntu ia ki kynhun Sengbhalang ba kim dei ban pynbunkam ha surok bad shoh ia ki briew hynrei dei ban wan sha Secretariat ban iakren ia kino kino ki ishu.
“Namar kane ka jingkyntu jong u DyCM, ngi la rai ban iaid sha Secretariat ban iakynduh bad buh jingkylli sha ki Myntri Sorkar, ia kaei kaba la jia ia ka Resolution ba iadei bad ka ILP, ka Ktien Khasi, kaei kaba jia ia ka kaiphod jingtohkit halor ka jingshah siat iap u Nongialam barim ka HNLC Bah Cheristerfield Thangkhiew, kaei kaba jia ia ki jingkynnoh bamsap, ka sienjam bala shim da ka sorkar halor ka jingkyrduhkam, ka bhah thungkam bad ruh ka Gaming Act” ula ong.
“Ngi wan da ka jingthmu ban iakynduh ia ki briew kiba mihkhmat ia ngi hynrei sngewdih ba ngi tip ba naduh nangne shakhmat, lada ngi kwah ban iakynduh ia ki nongmihkhmat lajong, phi hap ban pan jingbit na ka Deputy Commissioner. Ka long kaba sngewsih namar ngim pat ju mad ia kaba kum kane ka jinglong jingman ha ki por bala leit” ula ong.
Haba pynrem ia ka jingpynjari 144 CrPC hapoh ka Nongbah Shillong, u samla Roykupar ula ong ba kane kam dei kaei kaei ruh hynrei tang ka buit jong ka Sorkar ban setkut ia ka sur ki paidbah hala iing da kabym shah ia ki ban mih surok bad ban pyni ia ka jingbym sngewtynnad ia ka rukom treikam ka sorkar.
Haba kylli, u samla Roykupar ula ong ba ha ka jingshisha, ki sengbhalang kim kwah satia ban iakynduh ia u Myntri kam Pohiing namar kila tip lypa ba kan dei ka jingialang ka bym seisoh bad kaba shu pynsyrwa kai ia ka por.
“Hynrei haba kut, ngi burom ia u kum u Myntri kam pohiing bad ngi la leit bad pyntip ha u ba mynta ka sngi ngi la pynsdang ia ka Save Hynniewtrep Mission bad ha kine ki sngi ban wan, ki san tylli ki Seng kin nang pynjur ia ki jingiakhih” ula ong.
Ha kajuh ka por, une u Nongialam ka HYC ula maham ia ka Sorkar Jylla bad ki bor District ba kin long kiba la pynkhreh ia kiba bun ki jingiakhih ba syndet syndet.
