Shillong, Naiwieng 07: Ka All Meghalaya Karate-Do Association (AMKA) hynne ka sngi Palei, kala sdang iaka lympung iakob 30th State Karate Championship ha JN Indoor Stadium, Polo.
Ia kane ka jingiakob ialehkai Karate kaba 3 sngi la kyrshan da ka Directorate of Sports and Youth Affairs ka jylla bad la plie ia kane ka lympung da u Deputy Chief Executive Member jongka Khasi Hills Autonomous District Council (KHADC) u Bah Pynshngain N Syiem ha kaba la iadonlang u General Secretary ka Meghalaya State Olympic Association u Bah Finely L Pariat, u Joint Secretary ka MSOA Bah P Laloo.
Mynta u snem, kila don 456 ngut ki nongialehkai kiba la wan ban iashimbynta ha ka kumite (Sparring) bad Kata (demonstration of form) naduh ka 6 snem ka rta haduh kiba la heh. Ki nongialehkai kiba jop ha kane ka lympung kin shah jied ban mihkhmat ia ka jylla ha ki jingiakob kiba long hapoh ka ri bad ha ka Meghalaya Games.
Ka AMKA kadei ka kynhun kaba ju pynlong man la u snem ia ka lympung ia kob ialehkai ha ka jylla bad ka ju pynlong ruh ia ka jingiakob na ka bynta ki khynnah skul bad ki khynnah college man la u snem ha kaba da ki spah ngut ki nongialehkai ki wan ban iashimbynta.
Ka AMKA kala long ruh kaba seisoh ha kaba ki nongialehkai ki jongka ki ju wanrah nam bad burom ia ka jylla da kaba ioh khur ia ki takma ksiar ha ki jingiakob kiba long ha ka thain, ka ri bad wat shabar ri ruh.
Ia kane ka jinglah kadei kaba la pynpaw ruh da u Bah Pn Syiem bad u Bah Pariat ha ka jingai jingkren ka jongki.
“Ka AMKA kala noh synniang shibun bha lyngba ka jingialehkai Karate bad kane ka lympung ka long kum ka lad ia ki khynnah kynthei bad shynrang ban pyni ia ka sap ka phong ka jongki bad ia ka jingtbit ka jongki ha katei ka jingialehkai kaban pynsngewtynnad ruh wat ia ki nongpeitkai” ong u Bah PN Syiem.
Nalor kane ula pynpaw ruh ia ka jingsngewtynnad halor ka jingioh jingkyrshan kane ka kynhun na ka tnad Sports and Youth Affairs bad ula ong ba ka KHADC kan pyrshang ban ialeh katba lah ban iarap lem.
Katba u Bah Pariat ula ong ba u dap da ka jingkmen ban donbynta ha ki lympung iakob kiba pynlong da ka AMKA namar ba kadei ka synjuk jong ki kynhun ialehkai kaba tbit bha ha ka jingpynlong ia ki jingiakob bad kaba don iaka akor bad burom.
 hynne ka sngi Palei, kala sdang iaka lympung iakob 30th State Karate Championship ha JN Indoor Stadium, Polo.){kind=link}