Nongpoh, Risaw 01: Ka Ribhoi District Cricket Association (RBDCA), mynta ka sngi ka la sdang ïa ka Talent Hunt ba arsngi ha Byrnihat ne ka jingwad ia ka sap ialehkai jong ki rang bad ki thei ialehkai Kriket ka them Byrnihat ban pynrung ha ka Cricket Academy bad kin ioh ia ki jinghikai pyntbit.
Kane ka jingwad ia ki sap ka long naduh ki khynnah ba hapoh 14 snem, ba hapoh 16 snem bad ba hapoh ka 19 snem ka rta. Ia kane ka lympung la pynlong ha madan ialehkai jong ka Lum Nongrim, Byrnihat.
Da ki phew ngut ki heprit bad samla naduh ki kynthei haduh ki shynrang kila wan ban iashimbynta ha kane ka lympung jied nongialehkai kriket ha Byrnihat ka ban sa kut noh lashai ka Sngi U Blei.
Ki heprit bad ki samla kiba shah jied na kane ka lympung kin ioh ia ki jinghikai pyntbit bad kin shah jied ruh ban ialehkai na ka kynhun ialehkai kriket jong ka Ri-Bhoi District.
Ha katei ka Talent Hunt la wan ban sakhi lang da u Bah Rayonald Kharkamni President RBDCA, Bah Michael Kharhunai Secretary ka RBDCA, Nitesh sharma BCCI A level Coach, Sumit gurung BCCI level coach bad u Biswajit Das coach, ha ryngkat bad ki dkhot jong ka RBDCA.
Haba kren sha ki lad pathai khubor, u Bah Rayonald Kharkamni President ka RBDCA u la ong ba ka jingthmu jong kane ka Talent Hunt ka long ban sei ïa ki heprit bada ki samla kiba don ka sap ban ïalehkai cricket bad ban jied pat ïa ki ban pynrung sha ka Cricket Academy jong ka Ri Bhoi.
U ong ruh ba kane ka long ruh kum shibynta ban pynphriang ïa ka khubor shaphang ka jingialehkai Cricket namar ha jylla hi ki dang duna ban ïalehkai Kriket.
Hadien kane ka lympung ha Byrnihat, ka RBDCA kan leit ban pynlong ia kane ka juh ka lympung wad sap sa ha Umsning ka ban long ha ka 21 bad 22 tarik u Risaw bad ha Nongpoh ka ban long ha ka 27, 28 bad 29 tarik Risaw.
Ia ka lympung wad sap ha Umsning yn pynlong ha madan ialehkai ka shnong Patarim katba ia ka jong ka Nongpoh yn pynlong ha madan ialehkai jong ka shnong Umbuda.
