Shillong Nailar 12: Kum shi bynta ban rakhe lypa iaka Sngi Laitluid jong ka ri ne ka Independence Day ryngkat bad ka jingrakhe iaka Azadi ka Amrit Mahotsav, hynne ka sngi thohdieng, ka 2 Megh BN NCC, Shillong Group of North Eastern Region Directorate NCC kala pynlong iaka jingpynkhuid iaka shnong Smit, East Khasi Hills.
Ia kane ka jingpynkhuid shnong la pynlong ha ryngkat ka jingiatreilang bad ka Commissioner of Food Safety jong ka sorkar jylla ha kaba ki samla kynthei bad shynrang jongka NCC kila pynkhuid iaka shnong Smit.
Kila don 60 ngut ki NCC ryngkat bad u Lt P.P Jena ANO jongka Assam Rifle Public School, u Bah M.R Thangkhiew CTO jong ka Smit Secondary School bad 3 ngut ki Permanent Instructor jongka 2 Meghalaya BN NCC kila iashimbynta lang ha katei ka jingpynkhuid shnong ha kaba kila ioh ban lum haduh 80 Kg u nuit.
Ka Kong R.M Kurbah, kaba long ka Commissioner Food Safety bad ka Kong DBS Mukhim ka Asst Commissioner Food Safety kila ai jingkren ha katei ka sngi, ha kaba iadei bad ka jingdonkam ban pynlong iaka shnong ka thaw kaba khuid kaba suba bad ban pynsaphriang lem ia katei ka khubor sha kiwei pat.
Lah ban ong, ka NCC ka don iaka bynta kaba khraw ha kaban tei iaka imlang sahlang da kaba shimkhia ban leh ia ki kam kiban ai jingpynshai bad jingsngewthuh ia ki paid nongshong shnong.
Ka NCC kala noh synniang shibun na ka bynta ban pynneh iaka khuid ka suba kumba la maitphang da u Myntri Rangbahduh jong ka ri u Narendra Modi bad kum shi bynta jongka Swachh Bharat Abhiyan, ki NCC kila leit ruh ban pynsaphriang iaka khubor sha ki paidbah ha kylleng ki jaka ia ka jingdonkam ban im ka jingim kaba khuid ba suba bad long kiba leh khuid ha baroh ki liang.
