Tura, Nailur 21: U Deputy Commissioner ka West Garo Hills u Swapnil Tembe hynne ka sngi u la plie pyrda ia ka lympung 37th Meghalaya State Badminton Championship ha Indoor Sports Hall, Hawakhana, Tura ryngkat ka jingdonlang u District Sports Officer Saljagring M. Marak nalor kiwei kiwei.
Katei ka lympung kaba don haduh 170 ngut ki nongshim bynta, ka la don ia ki nongïalehkai ba wan na kylleng ki bynta jong ka Rilum Garo bad ia kane ka lympung yn pynhap pyrda noh ha ka 24tarik mynta u bnai.
U Rikrak Ch Momin, General Secretary ka Tura Badminton Association u la pynpaw ia ka jing sngewkmen haduh katta ban ioh pynlong ia katei ka Championship ha ka sien kaba ar hangtei.
“Ia kane la lah ban pynlong hadien 27 snem bad kane kan long ka jingai mynsiem ia ki samla ialehkai badminton ba dang khie. Kumta nga ngeit ba kum kitei ki lympung yn ïoh ban pynlong ha Tura ha ki por ban sa wan,” u la ong.
