Shillong, Nohprah 14 : Ka Meghalaya kala sdang pyntreikam ia ka Green Deposit Scheme (GDS) ban iakhun pyrshah ia ki jaboh plastic ha ki jaka jngohkai ba khring briew bha, kaban nang pynkhlain shuh shuh ia ka jing pyrshang ka Jylla ban wanrah ia ka kam jngohkai kaba neh bad ka rukom bret niut ha ka lynti kaba dei.
Ia kane ka skhim la sdang pyntreikam shuwa ha Sohra ( Cherrapunjee), Dawki bad ha ki jaka ba don ki Jingkieng Diengjri, kiba la sakhi ia ka jingkiew ha ka jingwan ki nongjngohkai bad ka jingbret ia ki jaboh plastic kaba la ktah ia ki khlaw ki btap, ki wah bad ki jingim ha ka mariang.
Hapoh kane ka sienjam, ki nongjngohkai pyrthei kiba rah ia ki mar plastic kum ki bilor um lane ki jingbam ba song plastic sha ki jaka bala buh (notified zone) kin hap ban siew ia ka pisa ba lah ban iohnoh pat kaba long T.100, ka ban sa pynphai hadien ka jingbret ia ki jaboh plastic ha ki jaka ba dei lane rah pat ia ki sha ki jaka ban mih. Kane ka sienjam ka long ban nym pynshlur ia ka jingbret pathar ia ki jaboh plastic hapdeng ki nongwankai.
Ka Green Deposit Scheme ka dei ka shibynta jong ki jingpynkylla bala shim da ka Meghalaya ban pyniaid ia ki jaboh, kiba kynthup ia ki jingpynkhuid ba la ialam da ki paidbah, ka jingpynbha ia ka jingpyniakhlad ia ki jaboh, bad ka jingpyntreikam kaba kham pyrkhing ia ki mar lastic. Ka iahap ruh bad ki jingbthah jong ka Meghalaya High Court halor ka jingpyrrkhing ia ki jingpyndonkam ia ki song plastic khamtam kiba ka jingrben ka long hapoh ka 120 micron.
Ki heh sorkar ki la ong ba kane ka sienjam ka kynthup lang ia ka jingpyntreikam bad ka jingpynsngewthuh, ha kaba ki nongshong shnong bad kynhun ba donbynta ha ka kam jngohkai pyrthei ki don ia ka bynta kaba kongsan ha kaban pyntreikam, ban pynthikna ia ka jingiada ia ka mariang haba kyrshan ia ka jingroi jong ka kam jngohkai pyrthei kaba don ka jingkitkhlieh.
Ka Green Deposit Scheme kan iaid ryngkat lang bad ka Clean Hills City Initiatives hapoh ka Swachh Bharat Mission-Urban (SBM-U) 2.0, bala kyrshan da ka Ministry of Housing & Urban Affairs ka Sorkar India ryngkat ka jingiatreilang bad ki Sorkar Jylla.
 ban iakhun pyrshah ia ki jaboh plastic ha ki jaka jngohkai ba khring briew bha, kaban nang pynkhlain shuh shuh ia ka jing pyrshang ka Jylla ban wanrah ia ka kam jngohkai kaba neh bad ka rukom bret niut ha ka lynti kaba dei.){kind=link}