Shillong, K’lyngkot 15 : U Myntri Rangbah ka Jylla Conrad K Sangma ula pynbna ba ka Sorkar kala pyniaid shaid shaid ha ka jingpyndait ia ki kor CCTV ha kylleng ka Jylla bad haduh 227 tylli ki kor lah dep ban pyndait kum ka jingsdang.
“Nga tharai kumba 70-80 percent kila dep….ngin sa sdang sa ia ka wat kaba ar ha kaba ngin sa pyndait sa 200 tylli” ong u Conrad haba iakren bad ki nongthoh khubor ha ka sngi Palei.
U Conrad ula pyntip ruh ba ka Sorkar kala pynbeit jingmut ban pyndait kor CCTV bad streetlights ha Jowai, Tura bad Shillong, ha kaba ia ka project la khmih lynti ban pyndep hapoh ka shisnem.
“Kane kan dei ka kam ka ban iaid shisnem lynter….kala iaid sted bha mynta bad bun ki shnong kila dep ioh ia ka” ula bynrap.
Haba kylli halor ka jinglut ban pyndait kor CCTV, u Conrad ula ban jur ba ka jingsngain bad ka jingiada ki kham long kongsan.
U Myntri Rangbah ula kular ba ka Sorkar kan iatreilang hajan hajan bad ki bor shnong kynthup ki Dorbar Shnong ha Shillong, ban pynthikna ia ka jingpyntreikam thikna ia ka project.
