Shillong Iaiong 13: Ka Khasi Students’ Union Shillong Mihngi Circle hynne ka sngi Saitjaiñ kala plie pyrda ia ka Maitshaphrang Knockout Football Tournament.
Ia kane ka jingiakob ialehkai Football la plie da u Vice President ka KSU u Samla Biangbor Lyngdoh Paliar ha ka jingdon ryngkat u samla Klinstar Shabong u Assistant Organising Secretary ka KSU, u President ka KSU Shillong Mihngi Circle u Samla Sonstar Nongkhlaw, ki nongkitkam shnong jong ka shnong Mawlong, Mawkynring bad kiwei kiwei.
U Samla Sonstar Nongkhlaw ula pyntip, ba ka jingthmu ban pynlong ia kane ka jingiakob ialehkai kadei ban wanrah iaka jingiajan hapdeng ki samla Khasi kiba shong ba sah ha ki shnong kiba hap ha ka jylli treikam jong ka KSU Shillong Mihngi Circle bad ba kin lah ban pyni ia la ki sap ki phong kaba la ai da u Blei bad ba kin lait na ki jingdih kiba sniew kum u drug bad kiwei kiwei.
U samla Biangbor Lyngdoh Paliar ula kitbok kitrwiang ia baroh ki kynhun kiba iashimbynta bad ula pynkynmaw ruh, ba kam dei ka sien kaba nyngkong ba ka Seng kan pynlong ia kum kine ki lympung ialehkai hynrei man la ka por ka ju pyrshang ban plie ki lad ki lynti ia ki khun samla ba kin pyni bad pynjanai iala ka sap ialehkai da kaba pynlong ia ki jingiakob ialehkai ki bapher bapher.
