Shillong, Nailur 14 : Da ka thong ban kyntiew ia ka jingialehkai Snooker ha ka jylla khamtam eh ha nongbah Shillong, ka National Peoples Youth Front (NPYF) Shillong City da kaba treilang bad ka Meghalaya Billiards and Snooker Association hynne ka sngi ka la plie pyrda ia ka lympung ialehkai jong ka All Shillong Open Snooker Tournament ha Laitumkhrah.
Ryngkat ka jingdonlang ki nongialam jong ka Association bad na ka NPYF ia katei ka lympung ialehkai la wan ban plie paidbah da u MDC ka Mawsynram Bah Alvin Sawkmie.
Hadien kane, utei u MDC ba dei ruh u Vice Chairman ka KHADC u la shim bynta ruh shipor ha katei ka jingialehkai kum ka dak ka jingplie ia ka.
Kum u Kongsan u Bah Alvin u la ai ka jingiaroh ia ki samla kiba jied ia katei ka jait jingialehkai kaba wat haduh mynta kam pat da paw bha hynrei kadei pat ka jingialehkai kaba myllen bha.
Na ka liang ki nongkitkam ka Asociation hapoh ka jingialam jong u General Secretary ki la pyntip ba ia katei ka jingialehkai lah ban ialehkai naduh ki khynnah kiba dang rit ka rta bad haduh da ki la palat 100 snem.
U pyntip ruh ba bun ki nongialehkai na ka jylla kiba la leit ruh ban mihkhmat kylleng ki lympung namar ia katei ka jingialehkai la shim bynta haduh 90 tylli ki ri ka pyrthei.
