Nongpoh, Kyllalyngkot 17: Ban ainguh ai dem ïa u Blei Nongthaw uba la kyrkhu ïaki jingthung tep, ki paid ki hajar jong ka Raid Marwet lyngba Ka Sohjer committee kumba ju leh manla u snem, ka la ïoh biang ban pynlong ïaka Sohjer Festival kaba la sdang hynne ka sngi Balang ha 9 mer Baridua, Ribhoi district bad yn pynkut pat ia ka haka 20 tarik jong une u bnai.
Kane ka lehñiam Sohjer kaba 4 sngi, ka dei ka jinglehñiam kaba shisien shisnem jong ki khun ki hajar ka Raid Marwet hadien ba kila dep ban lum ban lang ïa u kba u khaw bad ioh kheit ïa u soh nyngkong ban buh ka jingtyrwa hakhmat u Blei nongbuh nongthaw ba un kyrkhu kyrdoh ïa ki khun ki hajar ka Raid Marwet bad khamtam ba un dang theh ki jingkyrkhu ba kin nang roi nangpar haki liang baroh.
Ha kine ki 4 sngi kin don ki jingiakop bapher bapher naka bynta ki paid nongshong shnong jong ka Raid Marwet kiba kynthup naduh ka jingiakop shad tynrai, ka rwai tynrai lem bad kiwei kiwei. Haki sngi ki ban bud kan don ruh ka jing ïa knia ïa khriam naka bynta ban ainguh aidem ïa u Blei Nongthaw halor ki jingkyrkhu kiba u la theh lyngba ki jingthung jingtep jong ki.
Ïa kane ka Lehniam jong ki paid ki hajar ka Raid Marwet la wan ban plie da u Fr. Kmenlang Nongrum, Asst. Parish Priest Byrnihat haka jingiadon lang u Pa’iem Ken Syiem, Syiem jong ka Raid Marwet, ki longsan mansam, ki Pator lem bad ki rangbah shnong jong ki shnong bapher bapher.
U Fr. Kmenlang Nongrum kum u Kongsan u ïoh ban khap ïa u ribbon kum ka dak ka jingplie ia katei ka jinglehniam. Haba kren ha katei ka jingialang u Fr. Kmenlang u la ai iaka jingiaroh iaki paid jong ka Raid Marwet ba ki la lah ban pynlong ïa kane ka program kaba long ruh kaba kongsan eh khnang ba kin lah ban pynneh pynsah ïaka knia ka khriam bad iaki dak ko shin jong ki men ba rim.
