Jowai,K’lyngkot 17 : U Symbud Myntri Rangbah ka Jylla Bah Sniawbhalang Dhar ha ryngkat u Myntri Revenue Bah Kyrmen Shylla, ha ka sngi Balang, kila plie paidbah ia u motdur jong u Who Tep Kyndait ha Tuber Kmai Chnong, East Jaintia Hills District.
Ia kane ka prokram la pynlong da ka Seiñraij Tuber bad la pyniaid da u Bah Harvis Phawa, u President ka Seiñraij Tuber.
Haba ai jingkren, u Bah Kyrmen Shylla kum u symbud kongsan, ula kyntu ia u Symbud Myntri Rangbah ban wanrah ia ka surok kaba pyniasoh ia ka National Highway sha Khloo Blai (Law Kyntang) kaba hap hapoh ka Tuber Kmai Chnong khnang ban suk ka leit ka wai ki nongshongshnong bad ki nongshangkai pyrthei.
U Bah Sniawbhalang ula iaroh ia ka Shnong kaba hap hapoh ka Raij Tuber, kaba la iatreilang ban wanrah ia ka roi ka par hapoh ka thain.
Ula kular ha ka jingialang bad ma u ha ryngkat u Bah Kyrmen Shylla, kin pyrshang ban wad ia ki lad ki lynti ha kaban wanrah ia ka surok sha Khloo Blai.
Kiba la iadonlang ha ka jingialang ki kynthup ia u Bah Puramon Kynjing, Daloi ka Elaka Jowai bad u Bah Wailadmiki Shylla, MLA ka Jowai nalor kiwei kiwei.
