Nongpoh, K’lyngkot 17 : Ka FKJGP-North Khasi Hills bad ka shnat Ri-Bhoi Sepngi, hynne ka sngi Balang, kila hiar jurip ia ka surok PMGSY ba 5 Km na Nongbirthem sha Nongbirlum, kaba la shu iehteng da u contractor mynta la jan 5 snem khlem da lah pyndep satia.
Kane ka surok ka dei kaba la mang ban pyntrei haduh T. 2.57 klur bad la sdang pyntrei ia ka naduh u snem 2019.
Ia kane ka jingjurip la ialam da u President ka FKJGP-NKH Bah Luistar Lyngdoh, bad ka jingjurip kala sdang naduh ka jaka ba sdang pyntrei ia ka surok haduh kaba kut jong ka surok.
Ha kane ka jingjurip, ki Nongialam ka FKJGP kila peit bniah bha ruh ia ka rukom siang rong ha ki jaka bala dep siang bad shem ba ka jingsiang rong ka dei kaba stang shaba palat bad ka bymm iaid kat kum ka kyndon jong ka PMGSY.
Haba iakren bad ki lad pathai khubor, u Bah Luistar ula pynpaw ia ka jingsngewkhia ban iohi ia ka jingkheinsting jong u contractor ban pyndep ia kane ka surok, kaba dei kaba kongsan tam ia ki nongshongshnong ka thain. Ula ong ba kane ka surok ka dei kaba la sdang pyntrei naduh u snem 2019 hynrei haduh mynta mynne, u contractor u khlem lah pyndep satia.
Ha kajuh ruh ka por, u la pynpaw ba ka seng ka sngewkhia ruh ban lap ba ka jingpyntrei ia katei ka surok, kam shym la lai jinghun ia ki paidbah, nalor kata ba ka jingpyntrei ruh ka dei kaba la shimpor la bun bun snem.
Une u Nongialam ka FKJGP ula kyntu ia u Kontraktor, ba u dei ban pynstet noh ia ka jingpyntrei ia katei ka surok bad ba un shna kham bha ha kine ki bynta ka surok kiba duna ka rong, khnang ba katei ka surok kan long kaba neh slem bad ka ban ai jingmyntoi shisha ia ki paidbah kiba pyndonkam ia katei ka surok.
