Guwahati, Naiwieng 16 : Ka khlur ba pawkhmat ka Bollywood ka Kangana Ranaut kala wan poi ha Assam bad sdang ban ring ia ka phlim “Emergency” ka ban wan ha kane ka jylla.
Kane ka puron ia kaba la tip bha halor ki jingkren kiba ju pynmih ia ki jingkynthoh pyrshah dang shen kala wan jngoh ia ka Assam na ka bynta ban wad ia ki jaka na ka bynta ban sdang ring ia kane ka phlim bathymmai jong ka.
Ka Kangana kala pynlong ruh ka jingleit jurip ia ka Kaziranga bad ia ka Karbi Anglong khnang ban bishar bniah ia ki jaka na ka bynta kane ka phlim.
Lyngba ka Instagram kane ka puron kala thoh; “To ngin leh ia kane.Yn sdang ring ia kane ka phlim ‘Emergency’ ha Assam.Nalor kata kala thep ruh ia ki katto katne tylli ki dur kiba iadei bad kane ka phlim.
Da kaba pynshong nongrim halor ka jingpynjari ia ka ‘Emergency’ kaba shisha ha India ha ki snem 1975, ia kane ka phlim la thoh bad dairek hi da ka Kangana.Ha kane ka phlim kane ka puron kan shim ia ka bynta jong ka Myntri Rangbahduh (PM) barim ka India ka Indira Gandhi.
U tyngshop, u Anupam Kher un shim ia ka bynta jong u J P Narayan, u Shreyas Talpade un shim ia ka bynta jong u PM barim u Atal Bihari Vajpayee, u Milind Soman un shim ia ka bynta jong u heh shipai u Field Marshal u Sam Manekshaw, bad ka Mahima Chaudhry kan shim ia ka bynta kum ka nongthoh bad ka nongtrei kam bhalang ba pawkhmat ka Pupul Jayakar.
