Guwahati, Iaiong 17: Ban pyniaid shakhmat halor ka jingpyntreikam ia ka juk teknologi bad ban pynurlong ia ka thong jong ka Digital India, ka tnat shipai Indian Army mynta ka sngi Nyngkong ka la pynlong ia ka jingkhot rung kam kaba nyngkong eh lyngba ka Online Common Entrance Exam (OCEE) hapoh ka ri kabaroh kawei.
Kane ka pynpaw halor ka jingkylla kaba khraw halor ka bynta kaba iadei bad ka jingpynrung kam hapoh ka tnat shipai Indian Army.
Kane ka rukom treikam kaba thymmai hapoh ka ri ka la nang kham seisoh shuh shuh hadien ki jingpynshai paidbah ha kaba iadei bad ka jingpyntreikam ia ki digital system, bad mynta ki samla kila shemphang bha ha kaba iadei bad ki bynta kiba iadei bad ki jingpynlong ia ki eksam lyngba ki online.
Naduh une u snem shakhmat ia ka jingpynrung kam yn pynlong ha ki laitylli ki bynta.Ha ka bynta kaba nyngkong, baroh ki nong aplai ne candidate kin hap ban leh ia ka Online CEE.
Ha ka bynta kaba ar ia kito ki nong aplai kiba la shah jied yn khot na ka bynta ka jingpynrungkam sha ki jaka bala shim rai da ka Army Recruitment Office bapher bapher na ka bynta ban pyndep ia ki Physical Fitness Test bad Physical Measurement Test.
Ka bynta kaba lai bad kaba khatduh ia kito ki candidate ba la shah jied kin hap ban leit sa ia ka Medical Test.Hadien yn sa pynbna ia kito ki nong aplai kiban shah jied ban ioh rung sha ka kam.
Ia kane ka Online Common Entrance Exam yn pynlong ha ki 375 tylli ki Examination Centre ha ki 176 tylli ki jaka ha baroh ki bynta jong ka India naduh ka 17 haduh ka 26 tarik Iaiong 2023.
Ha kane ka thain North East Zone ia ka eksam yn pynlong ha ki 26 tylli ki centre ha ki 14 tylli ki jaka sor jong baroh ki hynniew tylli ki jylla.
Kine ki 14 tylli ki jaka sor ki kynthup ia ka Naharlagun ha Arunachal Pradesh; Dibrugarh, Guwahati, Jorhat, Silchar bad Tezpur ha Assam; Imphal, Ukhrul bad Churachandpur ha Manipur; Shillong ha Meghalaya; Aizawl ha Mizoram; Dimapur bad Kohima ha Nagaland bad Agartala ha Tripura.
