Shillong, Rymphang 13 : U Symbud Myntri Rangbah Bah Prestone Tynsong ula kyntait ia ka jingkynnoh jong u President ka Congress Bah Vincent H Pala ba ka jingbym lah ka Sorkar ban pyndep ia ka jingkular ban weng ia ka jingkhang tih dewiong, kala pynkulmar jingmut ia ki paidbah.
“Nga sngew ba ka bakla ban ong ba ki paidbah kila kulmar jingmut. Kam long satia kumta” ong u Bah Prestone.
U Bah Prestone ula kren halor ki jingeh bala buh da ka Nationalisation Act, kaba khmih mynshuwa ia ki major minerals kum u dewiong bad mawshun ha Meghalaya. “Lem kumta phi donkam ban sngewthuh kawei ba ha katei ka por wat ka Nationalisation Act ka don bad ngi mad ia ka jingeh kaba khraw bha” ong u Bah Prestone.
Ka Act ka ong ba ki marpoh khyndew bala pynlong mar ka ri, kim long shuh kiba lah ban pyniaid ne long trai da mano manor uh lait noh ka Sorkar India.
U Bah Prestone ula batai ba ka Sorkar MDA ba ialam da u Myntri Rangbah Conrad K Sangma, kala leit tied ia ka jingkhang ka Iingkashari Supreme Court ha u snem 2018 ban iakhun pyrshah ia ka jingkhang tih dewiong, kaba dei ka tyllong kamai baheh duh ha Jylla.
