Tura, Jylliew 24: Da ka jingthmu ban ialeh ban pynkhuid biang iaka Ganol Damsite namar ka jinglang jong ki jaboh jabaiñ, ki bor pyniaid district jong ka West Garo Hills hapoh ka jingialam u Deputy Commissioner u Jagdish Chelani, kila sdang iaka jingpynkhuid ia kane ka jaka kaba la lang ki jaboh.
Kumba 65 ngut ki briew na ki kynhun bapher kynthup ia ka Municipal, SRDF, Block staff bad Project staff jong ka damsite kila trei shitrhem ban pynkhuid ia ki jaboh kiba don katei ka wah kiba la wantuid na ka Wah Ganol sha ka damsite jongka Ganol Hydro Electric Project.
“Ngi la buh por ba hapoh 72 kynta ban pyndep ia katei ka jingpynkhuid” ong u Deputy Commissioner bad ula ong pat ba ia kane ka kam yn lah ban pyndep ha kine ki 3-4 sngi kiban wan.
Ula pynpaw iaka jingdiaw ba namar ka jingdum jong ka suinbneng ka lah pat ban ktah iaki kam ki jam ha kaban lah ban pynkhuid ha ka por kaba la buh ia katei ka bynta ba jaboh jong ka wah.
Ia kitei ki niut bad ki jaboh kiba la wan tuid sha damsite la lum la lang shi jaka bad yn pynkit ia kitei baroh sha ki jaka lum niut.
Namar ka jingjur jong ka jingpyntuid ia ki niut, na ka liang ki bor district kin daiñ kuna T.1 Lak ia ka Rongram Bazaar Committee.
U DC ula ong ba katei ka jingdain kuna kadei kum ka jingpynkynmaw ia baroh ki Market Committee bad ki kynhun kiba don bynta ba ka long kaba kongsan bad kadei ka kamram ban pynneh iaka jingkhuid jingsuba jong ka wah bad kino kino kiba pynjaboh kin shah pynshitom katkum ki kyndon aiñ.
Na ka bynta ka jingshngain jong kitei ki nongpynkhuid, kumta kila shim iaki lad ban iada ialade da kaba phong iaki jaiñjri, ki but, ki jingsopkti bad kiwei kiwei bad la pyndonkam ruh da ki Fiber Boat ban ioh tam ia ki jaboh bad iaki niut ki nier kiba don ha katei ka wah.
U DC ula ong, ba yn pynsngewthuh ruh ia ki paidbah ia ka jingdonkam ban tehlakam khnang ba kum katei ka jingjia kan ym jia shuh bad kila pynkhreh ruh ia ki jingthmu ban pyntreikam shi rta na ka bynta ban iada iaka nongbah bad district na kum katei ka jingjia.
U Chelani ula ong ba ki paidbah ki dei ban bret ia ki jaboh ha ki jaka bret niut khnang ba ki niut kin ym ioh ban tuid ha shi lynter jong katei ka wah bad ka tnad Public Health Engineering ka shim ia ki lad ban pynkhuid ia ka um hashwa ban pyllait sha kawei pat ka jaka.
Pule ruh: Mynjur ka KHADC iaka Resolution ban pyrshah iaka UCC
