Shillong, Nailar 22: Ka 30th Inter School bad 12th Inter College Karate Tournament, kaba la pynlong da ka All Meghalaya Karate-Do Association ha Sports Authority of India (SAI) Campus ha NEHU kala sdang hynne ka sngi Palei ha kaba 609 ngut ki nongialehkai Karate kila wan ban iashimbynta.
Mynta u snem kila don 609 ngut ki nongialehkai Karate kiba la iahsimbynta bad kala don ka jingkiew kumba 100 ngut na ka jingiakob kaba la pynlong ha u snem 2023. Ki nongiahsimbynta kidei kiba la wan ban mihkhmat na ki 95 tylli ki skul bad 7 tylli ki College hapoh ka jylla Meghalaya.
Ia kane ka jingiakob kaba 3 sngi la kyrshan da ka Directorate of Sports and Youth Affairs, ha kaba yn iohi iaka sap ka phong jong ki nongiashimbynta ha ki kyrdan bapher naduh ki heprit kiba hapoh 10 snem ka rta haduh ki samla kaba pyni ruh ba ka jingialehkai Karate ha ka jylla kala nang paw shuh shuh.
Ka Kong Isawanda Laloo, Secretary ka tnad Sports and Youth Affairs kala long kum ka kongsan ha kaba la iadonlang ruh u Working President bad General Secretary jongka Meghalaya State Olympic Association, u Bah John F Kharshiing bad u Bah Finely L Pariat.
Ka Kong Isawanda Laloo kala ong, ba tang khyndiat eh ki Synjuk Ialehkai ha kane ka jylla kiba la ioh mad ia ka jingjop kum ka AMKA, kaba la pynmih da ki spah ngut ki nongjop kiba la ioh khur iaki takma ha National Level, khlem da jer pat ia ki nongialeh Karate kiba la mihkhmat ia ka ri India ha ka South Asian Games bad Asian Games.
“Ka jingbei tyngka ha ki khynnah mynta, kan pynkylla sha ka jingjop lashai,” la ong ka Kong Isawanda.
“Ngi sngewthuh ia ka jingkongsan ban bat ia ki khynnah kiba rit, ban lap ia kito kiba don ia ki sap ki phong kyrpang bad ban ai ka lad ka lynti ia ki ba kin nang kiew shaphrang. Ka jingpyrshang jong ka sorkar kala long halor katei ka bynta da kaba iatreilang bad ka MSOA bad ki synjuk ialehkai” kala ong.
Katba u Bah John Kharshiing ula pynpaw ba ka jingpynlong ia ka jingiakob ialehkai Karate kala jam mynta sha sien kaba 30 bad ula ai khublei ia ka AMKA halor ka jinglah ka jongka ban pynlong beit ia kane ka lympung iakob bad dei na kane ka daw ba ki bun bha ki nongialehkai Karate.
“Kane kadei kawei na ki synjuk ialehkai kaba heh ha ka jingdon ki nongialehkai bad ka AMKA ka dei hok ban ioh ia ka jingithuh halor kane ka bynta” la ong u Bah Kharshiing.
 Campus ha NEHU kala sdang hynne ka sngi Palei ha kaba 609 ngut ki nongialehkai Karate kila wan ban iashimbynta.){kind=link}