Shillong Naitung 29: U Lamphang jong ka Lok Sabha u Om Birla hynne ka sngi Saitjaiñ ula plie ia ka Annual Conference kaba 20 jongka Commonwealth Parliamentary Association (CPA), India Region, Zone III kaba ar sngi ha nongbah Shillong.
Haba ai jingkren ha ka jingialang, u Om Birla ula iathuh ia ki jingnoh synniang jong u Lamphang ka ïing dorbar thawaiñ Lok Sabha bad u Myntri Rangbah barim ka Meghalaya u Purno Agitok Sangma.
“Ki jingnoh synniang u PA Sangma bam kwai ha dwar u Blei, ban ai ia ka lynti ba thymmai ha ki rukom treikam ka Parliament bad ka synshar paidbah ki dei ki ban neh shirta” ong u Birla.
Ula ong ba ka CPA, Zone III, Northeast ka dei ka rynsan ban iakren shaphang ki jingeh ha ka thaiñ bad ban wad ia ki lad ki lynti ban pynbeit ia kine ki jingeh.
Ha kine ki ar sngi, kine ki bynta jong kane ka jingialang kin iakren shaphang ki lad pyniasoh ha ka thaiñ, ki jingjialynshop ki bor ka mariang bad ki lad ban pynbeit noh ia ki.
“Ngi la iohi ia ka jingkylla ka suiñbneng ha kylleng ka pyrthei bad khnang ban pynbeit ia ki jingeh kiba mih na ka jingkylla ka suinbneng, kin don ki jingiakren ban pynbeit ia kine ki jingeh, kiba mih na ki kam jong ki briew bad ka mariang,” u la ong, da kaba bynrap ba ka jingpynbeit ia ki jingeh kiba mih na ki jingwan lynshop ka mariang, ki rukom ban kyntiew ia ki lad pyniasoh ha ka thaiñ shatei lammihngi, ka ioh ka kot bad ka jingwanrah ia ka jingryntih bad ka mariang da kaba pynthikna ia ka roi ka par ki dei ki kam kiba donkam bha.
U Lamphang ula ong, ruh ba ki jylla ka thaiñ shatei lammihngi ki la sdang ban iohi ia ki rukom treikam ha kiwei kiwei ki ri na ka bynta ka roi ka par bad ruh ia ki thong Sustainable Development Goal (SDG) bad mynta ki don ha ka lynti jong ka roi ka par bad ula ong ba kane ka jingialang kan pynkhreh ia ka rukom iaids hakhmat.
Ula iaroh ia ka jingstet jong ka roi ka par ha ka thain shatei lammihngi hapoh ka jingialam jong u Myntri Rangbahduh ka ri u Narendra Modi.
U Birla ula ong, ba ka rukom im ki paidbah ha ka ri India ka dei kaba iajan bad ka mariang bad kumta ka roi ka par kam dei ban ktah ia ka mariang.
U Birla ula ong ba ka thain shatei lammihngi ka don ia ki lad ha ka ioh ka kot ban iaryngkat bad kiwei kiwei ki bynta jongka ri India, kumta ka jingkyntiew ia ki jingdon jingem ka long kaba donkam bad ka ong ba ki katto katne tylli ki projek kum ka PM Gati Shakti, ka jingpyniar ia ki surokbah ha ka thain shatei lammihngi, ka jingkyntiew ia ka jingdon ki kad liengsuiñ ba treikam hapoh ka skhim UDAN bad ki jingkiew shaphrang ha ki kam Telecom, ki lad ka leit ka wan lyngba ki jaka shongum, ki lawkyntang, ki Industrial Park bad kiwei kiwei kila kyntiew ia ka thaiñ.
U Lamphang ula ong ba ka Zone-III jongka CPA India Region kadei kaba treikam bha hapdeng ki saw tylli ki Zone, ki 20 tylli ki Convention ba man u snem ba la long haduh mynta ki pyni ia ka jingieng skhem ha ki jingngeit jong ka synshar paidbah hapoh ka ïing dorbar thawaiñ, la ong u Birla.
Ula kren shaphang ka jinglong kyrpang jong ki ïing dorbar thawaiñ jong ka thaiñ shatei lammihngi ha kaba ula ong ba ki don ki jingiakren ba shongkor ha kine ki ïing dorbar khlem da don kino kino ki jingpynthut, kumta, ki mih ki jingpynbeit kiba skhem na kine ki jingiakren kiba wanrah jingmyntoi ia ka thaiñ bad ka ri bad kane ka dei ka nuksa ia kiwei pat ki Zone.
Ha ka jingiakren bad ki lad pathai khubor ha nongbah Shillong shaphang ki jinglong jingman ha Manipur, u Om Birla ula kyrpad ban don ka shongsuk shongsain.
“Ka shongsuk shongsain kadei ka lynti sha ka roi ka par. Nga kyrpad ba kan don ka shongsuk shongsain ha ka thaiñ shatei lammihngi,” la ong u Birla.
Ha kane ka jingialang jong ka CPA, India Region, Zone III kaba long ha ka ïing dorbar thawaiñ jong ka Meghalaya la wan ban iadonlang da u Myntri Rangbah ka Meghalaya, u Conrad K. Sangma, u Deputy Chairman ka Rajya Sabha u Harivansh Narayan Singh, u Lamphang ka ïing dorbar thawaiñ jong ka Meghalaya, u Thomas A. Sangma, u Lamphang ka ïing dorbar thawaiñ jong ka Arunachal Pradesh bad u Chairman ka CPA India Region, Zone III, u Pasang D. Sonaki.
Ha kane ka jingialang ba ar sngi kin don ki jingiakren shaphang ki artylli ki phang kiba kongsan – Ki jingjialynshop ka mariang bad ki rukom treikam da kaba peit bniah ia ka thaiñ shatei lammihngi bad ki lad jingiasoh ban kyntiew ia ka thaiñ shatei lammihngi ban iaryngkat bad kiwei pat ki bynta jong ka ri.
Ia katei ka prokram yn pynhap pyrda ha ka 30 tarik u Naitung da u Lat ka jylla Meghalaya, u Phagu Chauhan bad kan don ruh ka prokram ban pyni ia ka deiriti ha ka por janmiet.
Pule ruh: Pyntip u CM ban pynkynriah ia ka Conference ka CPA sha ka shiteng sngi ban burom ia ka Sngi U Blei
, India Region, Zone III kaba ar sngi ha nongbah Shillong.){kind=link}