Nongpoh, Iaiong 14 : Ka 4th Open to All Berchem Cup-2024 bala pynlong da ka Seng Samla, Nongpoh Proper, kala sdang hynnin ka sngi Saitjain ha Nongpoh bad haduh 20 tylli ki kynhun kila wan ban iashimbynta ban iaknieh ia ka nam lahduh jong kane ka lympung ialehkai.
Ia kane ka lympung ialehkai la plie da u Additional Deputy Commissioner ka Ri-Bhoi u Raja Brahma kum u kongsan ha ka jingiadonlang u Bah Rayonald Kharkamni, General Secretary ka Nongpoh Town Committee, samla Anthony Suchiang, General Secretary ka Dorbar Shnong Nongpoh bad kiwei kiwei.
Ha kane ka lympung ialehkai bala pynlong ha Madan ialehkai ha Sajer, Nongpoh, haduh 15 tylli ki kynhun kila iashimbynta ha ka jingialehkai jong ki Shynrang bad 5 tylli ki kynhun ha ka jingialehkai ki Kynthei, kiba wan na kylleng ki jaka kynthp na East Khasi Hills District.
Ka Seng Samla Nongpoh Proper ka la buh ruh ia ka jingkhalai nusib ne ka Lucky Draw ban kyrshan ia ka jingpyniaid ia kane ka lympung ialehkai basketball ha kaba ia ka Tarik ban pynbna ia ki nongjop, kan long ha ka 27 tarik u Iaiong 2024 ka ban dei ruh ka sngi pynkut ia ka 4th Berchem Cup 2024.
Haba kren ha kane ka sngi, ki kongsan ki la pynpaw ia ka jingkmen bad ban ai jingiaroh ruh ia ka Seng Samla Nongpoh Proper kiba na kawei ka snem sha kawei pat ki la nang iai bteng ban pynim ia kane ka lympung ialehkai basketball.
