Shillong, Iaiong 14 : U Nongaiktien ka National People’s Party (NPP) Bah Himalaya M Shangpliang ha ka sngi U Blei ula kob ia ka Liang Pyrshah Voice of the People Party (VPP) ba kan ujor da ka ejahar lane thoh sha ka Sorkar Pdeng ban phah tohkit ha ka CBI pyrshah ia ki Nongialam ka NPP, lada ki dei kiba bamsap.
“Ka long kaba suk palat ban shu kynnoh ia ka party ba ka bamsap. Nga kyntu ia ka VPP ba lada phi sngew ba ki Nongialam ka VPP ki dei kiba bamsap, nga kyrpad ia ki ba kin sngewbha ujor da ka ejahar ha ki Police Station ba marjan lane thoh sha ka Sorkar Pdeng ba kan thung ia ka jingtohkit CBI lane ka Enforcement Directorate lane kano kano ka Central Agency, sngewbha khot ia ki bad ai ba kin tohkit ia kum kine ki riew bamsap kiba don hapoh ka party” ong u Bah Himalaya haba iakren bad ki nongthoh khubor.
Haba pynpaw ba ka VPP kam don mat iakren shuh da kiwei pat tang ka jingkhot ia ka NPP ka party ba bamsap, une u MLA barim ka Mawsynram ula ong ba kane kam dei shuh ka ishu thymmai ba ka VPP ka khein ia ka NPP kum ka party ba bamsap lane ba ka Sorkar ka dei kaba pyniaid da ka NPP ka dei kaba bamsap.
“Ka dei ka kam kaba la iaid la slem bad kine ki dei ki slogan elekshon ia kaba ki pyrshang ban ioh jingmyntoi na ki. Hynrei nga ong tang kawei, ka VPP kam don ishu da kiwei pat pyrshah ia ka NPP lait noh na ka jingkhot kum ka party ba bamsap, balei namar ka NPP kala leh bha bad ka NPP kala pyniaid bha ia ka Sorkar bad ka NPP kala wanrah shibun bah ka roi ka par na ka bynta ki paidbah bad kam don jingkylli, kam don jingartatien halor kane..ka NPP ka dei ka party kaba thmu na ka bynta ki paidbah ka Jylla” ula ong.
“Ki don shibun bah ki skhim ba kane ka Sorkar ba ialam da ka NPP kala leh na ka bynta ki paidbah. Ngi lah ban iohi ba ka Sorkar kala pynioh palat 3000 km ka surok ha ki shnong nongkyndang tang ha kine ki san snem bala leit noh. Nga hap ban iathuh ia phi ba kane ka Sorkar kala wanrah ia ka song pisa ba kot haduh T. 14,000 klur bad la pynlut ia ka na ka bynta ka skhim MGNREGS kaba aikam 100 sngi ia ki briew ba don job card. Ka jingpynioh kam iaki samla bad hapoh ka CM Elevate lane hapoh ka PRIME, kila don bun bah ki skhim bad palat 5000 ngut ki samla kila ioh jingmyntoi n aka PRIME, phi lah ban mutdur ba ki dang don shibun kiei kiei kiban dang leh” ula bynrap.
Haba kyntu ia ki paidbah ban kyntait ia kum kitei ki jingkynnoh jong ka VPP, u Bah Shangpliang ula ong “Nga kwah ban kyrpad ia baroh ha ki 36 tylli ki constituency ba kine kiei kiei ki dei tang ki buit elekshon, ki dei kiba khlem nongrim bad kim don satia ia ka jingshisha bad kumta, ka VPP kam don ishu da kiwei pat lait tang ban khot ia ka NPP kum ka party ba bamsap”.
Halor ka jingkynnoh ba ka Sorkar NPP ka dei ka Sorkar ia ki high level, u nongaiktien ka NPP ula ong “Kane ka dei ka jingkren kaba la rim bha ia kita ki high level. Nga kwah ia ki ba kin leit sha ki shnong ki thaw..sngewbha leit sha ki shnong ki thaw kumba nga la kdew, leit sha ki jaka nongkyndong, wad na ki paid nongkyndong la kila shah pynduh ia kum kine ki jingmyntoi. Mynta, ki paid nongkyndong, kane ka dei ka sien ba nyngkong ha ka histori ka Meghalaya ba ngin sa ioh palat 1 lak tylli ki iing PMAY ia ki longiing ba duk ha Nongkyndong. Ngi trei na ka bynta ki paid ba duk ha nongkyndong, ngi sngewkhia ba ki briew ki khot ia ngi ki high level ne low level, kam don satia kaba kum kata”.
“Kumba nga ong, lada palat 1 lak ki iing ha nongkyndong ki leit sha ki paid ba duk ha ka Jylla, mano ban ioh jingmyntloi, kin dei ki paid nongkyndong. Lada 3000 km ka surok ladei ban siang ha ki jaka nongkyndong, mano ba ioh nong, ki lad pyniasoh jong no kiba la poi sha ki shnong kiba don sha kyndong eh jong ka Jylla bad lada T.14000 klur la pynlut ha ka MGNREGS skhim, mano ba ioh jingmyntoi, ki lynti iaid kjat, ki iingdorbar shnong, ki iing skul, ki madan ialehkai, baroh kine ki dei na ka skhim MGNREGS ha ki shnong, mano ba ioh jingmyntoi, ki dei ki paid nongkyndong kiba ioh jingmyntoi” ula bynrap.
Haba pynpaw ba bun ki skhim ba kum kine kin sa wan ha une u snem ba mynta, u Bah Shangpliang ula ong “Kumba phi tip baroh ba kane ka Sorkar ka dei ka Sorkar u paidbah bad ta ka daw kala dep ban mynjur ia ka mang tyngka ba T. 27,000 klur ha kane ka snem mang tyngka ba mynta”.
