Sdang iakhih ki nongtrei EMRI da kaba teh lama iong ha ki Ambulance ba kynnoh sngap mynthi ka Sorkar

Shillong, Jylliew 30: Ki Nongtrei ka 108 EMRI kiba don ha ka Meghalaya EMRI Workers Union (MEMRIWU), ha ka sngi Ba-ar, kila sdang ka jingiakhih ba jai jai da kaba teh lama iong ha baroh ki kali 108 ambulance kiba don ha kylleng ki jaka jong ka Jylla

U President ka MEMRIWU Bah Roypar Kharraswai u la ong, ba kane ka jingiakhih ba jai jai ka dei kaba la pynlong namar ka jingmynthi jong ka Sorkar ban pyntreikam ia ki mat jingdawa bad ban khot iakren ia ka seng.

“Ngi la aipor ia ka sorkar haduh ka 29 tarik Jylliew katkum ka khubor ba ngi la pynlait sha ki lad pathai khubor kham mynshuwa, bad mynta ka jingiakhih kaba jai-jai jong ngi kan iaid shakhmat naduh mynta ka sngi ka 30 tarik u Jylliew” ula ong.

U Bah Kharraswai u la ong ba kat kum ki jingpynlait khubor ha ka 3 tarik bad 11 tarik u Jylliew, ka seng ka thmu ban pan jingshai na ka Sorkar halor ka jingthungkam pura noh ia ki nongtrei bad ban kyntu ia ka sorkar ba baroh ki mat jingdawa bad ki jingeh ba dang sahteng ba ka sorkar kan pynbeit hapoh ka Ophis hi.

“Ngi la kyntu ruh ia ka Sorkar ban khot ia ngi sha ka jingiakren, pynban haduh mynta ka sngi, ym pat don ba khot ne ai khubor eiei ia ka Union” ong u Bah Kharraswai.

“Namarkata ngi kwah ban pyntip paidbah ba ka por ba ngi la buh ia ka sorkar kala kut ha ka 29 tarik u Jylliew bad mynta ka jingiakhih kaba jai-jai jong ngi kan iaid shakhmat “ ula bynrap.

U Bah Kharraswai ula pyntip ba ha kane ka jingiakhih, ka seng kan the/pyndait da ki lama iong ha baroh ki kali 108 ambulance khnang ba u paidbah un sngewthuh bad tip ia ki daw bad ba kin ym kulmar jingmut ne lyngngoh haba iohi ia ki lama iong.

“Kane ka long ka rukom pynpaw jong ngi ia ka jingsngewkhia bad ka jingsngewlynga bad jingsngewsih halor ka jingsngap bad ka jingbymsuidn̈iew ka Sorkar halor ki jingdawa ba shisha jong ngi”, u la ong.

“Ngi kwah ruh ban pyntip ba lada ka Sorkar ka iai kyntait ban sngap ia ki jingeh jong ngi, ngim banse ban shim iaka rai ban sdang da kiwei pat ki jingiakhih kiba kham tyngeh bad kane kan ktah ia ka jingshakri ha Jylla Meghalaya baroh kawei” u la ong.