Pan kaiphod halor ki FSL ba treikam laitluid
Shillong, Jylliew 30 : Ka Meghalaya High Court kala register ia ka suo motu PIL ban shong bishar ia ki jingduna ki jingtei/tiar jong ka Forensic ha Jylla bad bthah ia ki borkhmih ban khmih ia ki lad ki lynti ban seng ia ki Forensic Science Laboratories ba treikam laitluid ha Meghalaya.
Ia kane ka hukum la pynmih da ka Division Bench ba kynthup ia ka Chief Justice Revati Mohite Dere bad Justice W Diengdoh ha ka sngi Nyngkong (29 tarik Jylliew).
Ia kane ka PIL la wanrah hadien ka jingbthah na ka Iingkashari Supreme Cpourt ha ka hukum ba 11 tarik Jymmang 2026, ha ka mukotduma u Sunny Chauhan pyrshah ia ka Jylla Haryana.
“Ha kane ka Suo Motu PIL, ngi sngewkhia eh bad artylli ki mat kata (i) ka jingbiang nadong hadong ha ki jingtei bad ki tiar ki tar jong ka Forensic Science Laboratory (FSL) ha Meghalaay bad ka jingaiti ha ka pork aba biang ia ki kaiphod FSL ha ki case kam bymman bad (ii) ki rukom treikam ba don mynta ban upload bad iasam ia ki statud report ha ki case kam bymman, kynthup ka jinglah ban shna ia ka digital police portal ban pynthikna ia ka jingioh ha ka por kaba biang ia ki kaiphod hashuwa ka sngi shong bishar ba la buh” pynpaw ka Iingkashari.
Ka Iingkashari kala bthah ia ka Registry ban pynngat sa artylli ki liang mamla. “Ngi sngew ba ka dei ban bthah ia ka Registry ban pynngat liang mamla ia ka Directorate of Central Forensic Science Services, Ministry of Home Affairs, New Delhi bad ka Directorate of Forensic Science Laboratory, Meghalaya kum ki respondent No 3 bad 4” ong ka hukum.
Ka Jylla kala pan por ban ai jubab halor kane.
“Ha kajuh ka por, u AAG ula pan por ban file ia ka affidavit ban jubab. Ka kashari kala ai ia ka por bad la bthah ban file sha ka Registry hapoh k alai taiew” ong ka Iingkashari.
Haba bishar ia ki jingsngewkhia halor ka jingdon ia ki jingtei/tiar, ka Iingkashari kala ong “Ia mynta, ngi kyntu ia baroh ki liang mamla ba dang shu pynngat ba kin bishar ia ka jinglah ban pynkha ia ki FSL ba treikam laitluid ha Jylla Meghalaya”.
“Haba khmih ia ki kam kiba don bynta, ngi sngew dei ban thung ia u K Ch Gautan kum u Amicus Curiae ban iarap ia ngi ha kane ka PIL” ong ka Iingkashari haba bynrap ia ka Registry ban phah ia ka petition sha u.
Ka Iingkashari kala buh ban bishar biang ia kane ka kam ha ka 27 tarik Naitung, 2026.
