Tura, Naitung 20: U MLA ka Rangsakona, u Subir R Marak, ula don hapdeng ka jingshah peitkhmat,hadien ba mih ka jingkynnoh ba ula thombor ia uwei u nongap ka iingsah MBOSE ha nongbah Shillong lyngba ka video kaba la saphriang ha kylleng.
La iathuh ba katei ka jingjia, kala jia ha ka 16 tarik u Naitung ha ka por 2 baje mynstep ha kaba une u MLA ka NPP ula poi ban leit buh ia ki paralok kiba ula khot ban bam ja miet ha ka iing sah jong u. Ka jingpynslem u nongap ban plie ia ki khyrdop kala pynbitar ia u MLA ia kaba la kynnoh ba u la shoh khawiang ban ktah kti.
Ki video na ka CCTV ki pyni ba une u nongthaw aiñ ula kren ia u nongap shwa ban thap ia u nongtrei jong ka MBOSE. Nangta la tan noh ia u MLA sharud da uwei na ki paralok jon gu bad ban pynjai jai ia u. Hynrei une u nongthaw aiñ ula paw kumba um pat dap satia ban thap, ula rkhie bein ruh, shuwa ba ki bor khmih kin wan poi ha katei ka jaka da ka thuk thuk ban pynjai jai ia katei ka jingjia.
U MLA ka Rangsakona ula pynshai ia katei ka jingjia da kaba kynnoh ba ula hap ban ap kumba shiteng kynta shabar, namar ba ym don ba wan plie ia ka khyrdop ban ailad ia ki paralok ki jong u ban leit shongthait ha ki kamra ki jong ki.
Ha ka kyrwoh khubor, u Subir Marak ula kam ba ula bat ia katei ka Guest House ban pynsah ia ka kynhun nonghikai na rilum Garo, kiba la wan ban ia kynduh ia u Myntri ka pule puthi.
“Nga la khot ia ki ban iabam ja miet ha ka jaka sah jong nga bad hadien ba la dep bam ja miet, nga la leit on ia ki sha ka Guest House. Nga la poi ha ka por 2 baje mynstep badnga la ap hangtei shiteng kynta da kaba pynsawa ia ka ‘siren’ bad ka ‘horn’ bad u PSO jong nga u la kiew halor ka kynroh ban kyrsiew ia u nongap,” la kynnoh u nongthaw ain.
