Shillong, Naiwieng 20: Ka kynhun ialehkai Football ka jylla Meghalaya kala pynrem ia ka Arunachal Pradesh ha ka Group E jong ka Senior Men’s National Football Championship jong ka Santosh Trophy 2024-25 kaba la long hynne ka sngi Balang ha Nalbari, Assam.
Kane ka jingiakhun bad ka jingialehkai bha ki rangialehkai ka Meghalaya kala long kaba itynnad ha kaba ka Arunachal kala tam da 3-1 ha kawei ka khyllipmat, hynrei ka Meghalaya kala ioh thep syndon sa 3 kol ban ioh khur ia ka jingjop.
Mar ia sdang ka jingiakhun u Overkindness L Mawnai ula thep ia ka kol ha ka minit kaba 8 na ka bynta ka Meghalaya, hynrei ka Arunachal kala iakhun tyngeh bad hashwa ban kut ka kylla step kala ioh thep 2 kol lyngba u Omang Dodum ha ka 15 minit bad u Tagru James ha ka minit kaba 45’+1.
Ka Arunachal kala bteng ban thep sa ia ka kol kaba lai ha ka minit kaba 61 lyngba u Tarh Dolu hynrei kane kam shym la pynduh mynsiem pat ia ki rangialehkai jong ka Meghalaya, hynrei kala pynlong ia ki ban ialehkai bha bad ha ka minit kaba 63 u Fullmoon Mukhim ula ioh thep ia ka kol bad ha ka minit kaba 65 u Robertson Khongriah uba la mih bujli ula ioh thep ia ka kol bad kane kala pynia khaid biang ia ka jingiakhun.
U Fullmoon u kapten ka Meghalaya uba la ioh ruh ia ka khusnam ‘Player of the Match’, ula thep ia ka kol ka baar ka jongu ha ka minit kaba 83 ban pynskhem syndon ia ka Meghalaya ba kan khur ia ka jingjop kaba hapoh ka jingialam u Bah Hering Shangpliang kum u Coach.
Hadien katei ka jingiakhun ka Nagaland kala pynrem ia ka Assam da 2-1 ha ka Group E.
Ka Meghalaya kan iakhun pyrshah ia ka Nagaland ha ka sngi Thohdieng bad tang ka lahduh jong katei ka Group kan ioh rung sha kawei pat ka Round jong ka Santosh Trophy.
Ki nongialehkai jong ka kynhun Meghalaya hynne ka sngi ki kynthup ia u Siwel Rymbai (GK), Overkindness L Mawnai, Arlangky Nongsiej, Donborlang Nongkynrih (sub Aenam Jyrwa 64′), Wanboklang Lyngkhoi, Aibiangmame Nongneng (sub Deibormame Tongper 64′), Badondor Marbaniang (sub Robertson Khongriah HT), Damanbhalang Chyne (sub Baiaikara Swer 85′), Fullmoon Mukhim, Kevin Rymbai, Donlad Diengdoh (sub Banraplang Pyngrope 85′).
