Shillong, Nohprah 24 : Ka Meghalaya kala pyndep ia ka jingiakhun group stage ha ka senior Men’s National Football Championship jong ka Santosh Trophy 2024-25 da ka jingiakhaid ba mar 0-0 kol pyrshah ia ka Odisha, ha ka jingiakhun hynne ka step sngi Ba-ar ha Hyderabad.
Namar bala ioh rung lypa sha ka Quarterfinal hadien ka jingjop ia ka Goa arsngi mynshuwa, u Coach ka Meghalaya Bah Hering Shangpliang ula ailad ia ki rang ialehkai ba shongben ba kin ialehkai ha kane ka jingiakhun.
Ka Odisha, watla, ka kwah ban jop ban don jingkyrmen ha kaban rung sha ka knockout round, hynrei kila kut ha ka jingbynniaw da ka jingbym ailad satia ka Meghalaya.
Ka Meghalaya kaba don ha ka kyrdan ba-ar ha, kala ioh kamai 8 point bad ka Odisha kaba don ha ka kyrdan kaba saw, kala kamai 5 point. Hynrei kane ka kyrdan ka lah ban kylla bad ka shong eh ha ka jingialehkai hapdeng ka Delhi (6 point) pyrshah ia ka Goa (3) hynne hi ka sngi. Kiwei pat ki jingiakhun hynne ka sngi ki long hapdeng ka kynhun ba kamai bun point eh-ka Kerela (12 point) bad ka Tamil Naduh kaba dang ioh kamai tang 2 point.
Tang saw tylli ki kynhun na man ki group kin ioh rung sha ka thup last-8, ka b aka jingiakhun kan sa long hadien ka Khristmas.
Ha ka Group A, ki kynhun bala rung sha ka quarterfinal ki dei ka West Bengal, Manipur, Services kaba dei ka lahduh ha u snem bala lah bad ka Jammu and Kashmir.
